Paife kolukanda okwa tungwa oshitaashi shopolifi shipe.
Minista woikwameni, eameno nomataulukilo okeengamba, Albert Kawana okwa patulula oshitaashi osho pambelewa oshivike sha dja ko.
Oshitaashi shopolifi osha tungifwa komina yaRossing kongushu yoshimaliwa sheemiliona N$23.2.
DRC olukanda limwe li hadi ovanhu vahapu unene tuu ookalyamupombo noshoyo ovanhu tava landifile momapandaanda, neendingosho.
Kawana okwa pandula omina yoRossing molwokuyambidida oshikondo shopolifi nelalakano lokukandeka oimbuluma moshitulwa Erongo.
Minista okwa ti oshitaashi shopolifi otashi ka kwafele ovakalimo vokolukanda DRC okukandeka oimbuluma noupu nokupewa omayakulo oo a yandjwa kopolifi.
“Olukanda DRC olo limwe la didilikwa ha li lopotwa oimbuluma ihapu ngaashi oumbudi wokuteya omaumbo, ovanhu tava nyekwa omaliko avo noshoyo omadipawo,” ta ti.
Kawana okwa ti oimbuluma oya londa pombada moshilongo unene tuu omakwatonghonga nomahepeko omomaumbo.
“Ounona novakainhu ova ninga oihakanwa yokudengwa nokudipawa.
Otwa pumbwa okulongela kumwe ha tusheni okukondjifa omahepeko omomaumbo,” ta ti.
Minista okwa yelifa ta ti oimbuluma otai kandekwa noupu ngeenge oshiwana tashi longele kumwe nopolifi okuyandja ouyelele kopolifi.
“Ovapolifi ova pumbwa ouyelele tau dilile moshiwana opo va dule okuninga omakonakono noupu. Omunhu keshe oku na oufemba wokulopotela opolifi kombinga yoshimbuluma shonhumba,” ta ti.
Kakukutu Inspector General Joseph Shikongo okwa pula ovapolifi tava ka longela koshitaashi shopolifi shipe opo va yakule nawa oshiwana.
“Oshitaashi osha nuninwa ovanhu aveshi va pumbwa omayakulo opolifi. Ina ndi hala okuunda omunhu ta nyenyeta shaashi ina ya kulwa nawa kovapolifi,” ta ti.
Shikongo okwa lombwela ovapolifi opo ve li umbata nawa nokuulika oshihopaenwa shiwa ngeenge ve li moshiwana.
Okwa ti ombelewa yaye melongelokumwe nomahangano a yooloka otava twikile okuyandjaneka omayakulo opolifi popepi noshiwana.
Mario Shiwedha omukalimo womulukanda DRC okwa ti paife itava ka longifa vali oshitaashi shopolifi shoMondesa shaashi paife ove li popepi nomayakulo opolifi.
“Ngeenge twa ya koshitaashi shopolifi koMondesa hatu hangeko ovanhu vahapu ve li momukweyo.
Naashi ohashi eta omunhu a yakulwe kwalata,” ta ti.
-fhamalwa@nepc.com.na