Auleria Wakudumo 

Ouministeli wouhaku nomayakulo opashiwana owa yandja ombautu yomayakulo opauhaku koshitukulwa shaZambezi. 

Minista wouhaku Dr Kalumbi Shangula okwa holola ta ti ombautu oya nuninwa okuyandja omayakulo opauhaku moshitukulwa unene pefimbo apa omeva a ninga mahapu. 

Ouministeli melongelokumwe nehangano laAmerica hali ifanwa United States President’s Emergency Plan for AIDS Relief (Pepfar) ova yandja ombautu koZambezi ongoshiendifo okukwafela ovanaudu pefimbo lomeva. 

“Ombautu oi na ongushu yoshimaliwa shi fike poN$600 000. 

Ombautu oya longelwa okutwala eedokotola, ovapangi novanaudu koihakulilo unene eenhele odo hadi kala efundja osho yo oImpalila Island,” Shangula ta ti. 

Shangula okwa ti okuyandja ombautu otaku holola elitulemo louministeli mokukwashilipaleka kutya keshe Omunamibia ota mono epango lopaunamiti longushu loo olina ombilixa. 

“Onghalo yoshitukulwa shaZambezi ohai ningile ouministeli wouhaku shidjuu okupanga ovakwashiwana pefimbo lodula shaashi eenhele ohadi kala da dingililwa komeva efundja. Oupyakadi ou owa kandulwa po keyandjo lombautu ei,” Shangula ta ti. 

Okuyandja ombautu okudja kouministeli wouhaku otaku holola omangela yomhango yexumokomesho laNamibia oyo opo ya pitikwa koUniversal Health Coverage (UHC). 

Shangula okwa weda po ta ti osho hashi ifanwa oUniversal Health Coverage Service Coverage Index paife oshili po 63%. 

“Efudja ihali yi ashike onghalo yefiku nefiku moshipala ndele ohali imbi yo oilonga youhaku. 

Ombautu otai ka kwafela ounona novakulujkadi pefimbo lidjuu oshoyo okulotokela peenhele apa pena omukifi wonhumba wa tukuka,” Shangula ta ti. 

-wakudumoauleria@gmail.com