Kansela gwoshikandjohogololo Okatyali moshitopolwa shaShana, Joseh Mupetami okwa ti, ethimbo lye lyokulela ongakansela olye ya pehulilo.
Mupetami okwa popi ngaaka ongula yEtitatu moonkundathana noshifokundaneki shika, ta fatulula kutya okwa lela sha gwana nokwa hala okugandja ompito kaagundjuka.
“Onda lela omimvo 27, ihe shoka nda longela oshigwana, osha gwana, naangoka ta ka tsikila ko onda hala a longe nuudhiginini ngaashi nda kala tandi shi ningi,” ta popi ngaaka.
Kansela ngoka e shiwikile e na oshigwana komutima okwa ti itaka kutha ombinga ongomuulikwakansela oshoka okwa ndhindhilike kutya ope na aanyasha ye na ontseyo nomadhiladhilo omawanawa taya vulu okuhumitha komeho oshikandjohogololo shOkatyali.
Ta ti, aanyasha oye na omadhiladhilo taga endele pamwe nethimbo onkene ndika ethimbo lyawo oku ya pa ompito opo yu ulike shoka taya vulu okuningapo omanga kuyele, naampoka taya ka pogola otaya vulu okupukululwa omanga aakulunhtu ye li po.
“Nonando onda pewa ompito okuulika mboka taya vulu okuthikama ongaawulikwakansela, itandi vulu okuya totha mo,” ta popi ngaaka.
Mupetami okwa kumagidha ngoka ta ka ninga omunelago , a longe neyitulemo nokuhumitha komeho oshikandjohogololo ihe haku shi shunitha monima.
Ta gwedha po kutya ethimbo lye olya thiki pehulilo.
“Oshigwana shomoshikandjohogololo Okatyali onde shi longele omauwanawa ogendji, mwa kwatelwa ngoka nda eta po ngame mwene, nasho shene oshi shi oku shi koleka. Ndhika itandi dhi popi ndi inenepeke ihe oshoshili,” Mupetami ta ti ngaaka.
Ta ti nonando a kala nokulonga ngaaka, ope na wo aaleli yamwe ya kala inaaya nyanyukilwa iilonga ye, shoka natango sha gwedha ko komaupyakadhi a kala a taalela.
Mupetami okwa laleke oshigwana she nokwe shi halele omayambeko, sho shi kale nomikalo osho wo ombepo ombwaanawa ya kala nayo omanga te ya lele.