OSHIKANGO – Kakukutu kopolifi Inspector General Joseph Shikongo okwa kunghilila Ovaangola hava landifa omahooli kOshikango opo va xulife po okulongela Ovanamibia ominyonena.
“Inamu ponokela vali Ovanamibia neembele noku va denga. Nashi ningi shaxuuninwa okunyeka ovanhu omaliko avo,” ta ti.
Edi Shikongo okwe di popya mexuliloshivike pefimbo a shakeneka ovakwashiwana Ovaangola keengaba kombinga yaShikango.
Okwa li natango a ninga omutumba novakalimo va dja mOshikango nosho yo omikunda di li popepi nelalakano lokukundafana nghene oimbuluma tai kandekwa.
Okwa didilikwa Oshikango osho shimwe shi li onhele lokulongelwa oimbuluma moshitukulwa shaHangwena.
Ovanamibia ova ninga oihakanwa yokudengwa nokunyekwa omaliko avo ngeenge tava di moAngola omanga eetuwa hadi dengwa nomamanya.
Shikongo okwa lombwela ovapolifi tava longele kOshikango opo va longe nelitulemo okulwifwa oimbuluma keengaba.
“Ovapolifi nava kale efimbo keshe tava ende komalukanda nokeengaba tava ningi omapekapeko. Oshi li oshinakuwanifwa shomupolifi okuamena oshiwana nokutula po elandulafano,” ta ti.
Okwa yelifa ta ti omupolifi ina pumbwa okudenga omunhu fiyo te mu monifa oshiponga ashike eshi sha fimana okukwata po omunhu noku mu twala koshitaashi shopolifi.
Okwa lombwela ovapolifi opo va kale alushe tava fiki koshiwana pefimbo ngeenge va lopotelwa kombinga yoshimbuluma shonhumba.
Shikongo okwa kunghilila ovapolifi opo va xulife po okulongifa ombabo.
Okwa yelifa ta ti moshitukulwa shaHangwena omu na ovapolifi vavali ve li modolongo konima eshi va longifa ombabo.
“Oshiwana nashi longele kumwe nopolifi okuyandja ouyelele pefimbo kombinga yoimbuluma,” ta ti.
Kakukutu kopolifi okwa kunghilila oshiwana opo shi xulife po okulandifa omahooli momaumbo molwaashi osha nyika oshiponga.
“Omunhu ngeenge e na omahooli meumbo ile a humbata omahooli motuwa yaye otashi dulu okueta oshiponga shomundilo,” ta ti.
Oshiwana okwa li sha holoka momwalu muhapu okupwikina kakukutu kopolifi Shikongo nokwa li sha mona omhito yokupula omapulo nokuandja omawedelepo.
Lonia Nghina omukalimo womOshikango ha landifa okapana okwa ti okwa pandula kouyelele ou va pewa notava ka longela kumwe nopolifi okukandeka oimbuluma.