ǂNŪǂGOAES – !Goaxa -ǁaeb mûǂuib is hoan xa a sī!nâhe ǁkhā, sîsenmā-aon ǂgaoǀkhādi ǀkha ra ǀgau tsî ǁkhāti ǂgaoǀkhādi ai ra dīǀoaǀoa, !omkurus ǁkhāǁkhākhâide !khawagas di ǀgam ǀkharikha mās ai a !gao!gaosases ge, ǂNūǂgoaes !Omkurus ǁKhāǁkhākhâis Sentersa (KVTC) ǂoaǂamsa !ēde sîseno ǂkhamkhoen !aroma nî mā. New Erab ǀkhab ge ǂoa ge wekheb di Donertaxtsēs ai ūhâ i !gam dî!nâǁgamǁares !nâb ge ǀasase ge !gaehe danab nē senters dib, Benedictus Diergaardta ge mî, !uru sîsenni senters dib !omn ǀkha xūna dīs ǁkhāsiba mās ǁkhā-ǁkhākhâidi !âse, ǁîb nēsi ǀgaisase danasa ra ǀhōǂui enerxib ǀkhāb ai !âb (ǁkhawa sîsenūhe ǁkhā !nanǀgaib, oli-i tsî xas-i) tsî !hū-omkhâis tsîna !khōǂgā hâse nî ǁkhāǁkhākhâisa. 

“!Âǀhuru-aon ǀkha ge hâ i ǁgamǁaredi !nâ-ūn ge sao ra ǁkhāǁkhā!âgu, ǂgaiǀons ai ǂharugun ǂgaoǀkhādi ai ra dīǀoaǀoa sweis sîsengu, sores ǀgammi ǀkha ra sîsen !nanǀgaiba !amǂgā tsî hoaǁae !gâi sîsenǀgaub !nâ ūhâs, daoga kurus, sîsengu aib ai sîsenni ǀkha !gaeǁaresa ūhâse ra hā tsû-ain, ǀaegu tsî ǁōgu tsîna ǁkhaes !norasa tsî ǂuru sîsen ǂnamipeba ǁawoǁawos di ǁkhāǁkhākhâidi, kai masingu !nari-aon tsî sîsenū-aon ǁkhāǁkhākhâidi, instrumentan texnise sîsenū-aon ǁkhāǁkhākhâidi ǂans tsî ǁnâuǂharugub texnoloxib hâna, ǂâi!nâǁgui-ai tsî !gôagu ra mā-amse !goaxa ǁaeb !nâ nî ǁkhaeǁnâhe,” tib ge Diergaardta ge mî. 

!Goaxa kurib, 2026 !aromab ge ǂhanuba a ū mîǁguib, hoa ǀgapi ǁkhāǁkhākhâis !khaigu tsî !omkurus ǁkhāǁkhākhâis !khaigu tsîn hoan nî mātareo!nâ !khaisas nî hana ǂgui !gôagu ǁkhāǁkhāsenaona nî ǂgaes kara, soab aib ge Diergaardta ge mî, “Hana i ǁnāti ī mâsiba nî hâs kara, o da ge ǂgaoǀkhāde nî ǂgâxa-ū tsî ǁnās ǀkha ǁawoǁawo, sida senters ūhâ tani ǁkhāsiba da !nāǂam tidesa”. 

Nēpa ra ǁkhāǁkhākhâide !khō!oa student mâ ǀgaugu ai !âisensa nî hōs di dîs aib ge Diergaardta ge mî, senters nî ǁKharas kharib !nâ hâ ǀgau ra ǂnûiǂgādi ǀkha sîsenǁare tsî oresa hōsa. “Sida ǁgui-ais ge ǁnā ǀgôan hîa ǁnâu!āb !nâ ǀgaisa taman tsî ai!gû taman tsîna ǁîn !harib ai hâ ǁkhāǁkhākhâide nî māsa. Nēsa sī!nâs !aromas ge ǂâisa ǁkhāǁkhā!khōǂgāb !nâ dīhe nîse a mîsa !âisens ǁaxasigu ai nî hâ,” tib ge ge mî. 

ǀGūǁae ge hâ i !âǀhuru-aon ǀkha ǁgamǁaredi ge Hyphens, Europab !Gaeǁares di ǂNûǁkhaeba-aon Namibiab !nân tsî GIZs hân ǀkha ge hâ i, ǁîn tsîn ǁkhāǁkhākhâide mās !aroma nî !â kaise. Mâǁaeb ais sentersa ǂhanusise nî ǁkhowa-amhes ai ge hâ i dîs aib ge Diergaardta a mîs ge, ǂhanusises nē sentersa ǀgūǁaeb !nâ Namibia Training Authoritis ai nî ǁkhaeǁnâhe !khaisa. ǂGuro studentn di ūǂgās ge ǂKhoesaob/Aoǁkhumuǁkhâ ra !âubasenhe. Senters (KCTC) di dītoahes ge N$120 miljuns xa a !nāsa tsî 300-500 kōse hâ studentna a tani ǁkhā.