Minista gwomayambulepo gomikunda noondoolopa James Sankwasa okwa ti, elelo lyondoolopa lyOmuthiya olyi na mayola nale, nokwa yeleke kutya ngoka ta popiwa a thigi po iilonga oJohannes Ndeutepo.

Sankwasa okwa yamukula ngaaka sho taku popiwa kutya okwa laleke Ndeutepo miilonga ongamayola sho anuwa ha faula kiilonga, omanga e na iilonga yilwe koWindhoek. 

“Ngame inandi tidha Ndeutepo kwa li gondoolopa yOmuthiya, ihe okwa thigi po ashike iilonga sha ikwatelela kokamusindolandu oka-13, komalelo goondoolopa  hoka taka ti, ngele kansela iha zi momudhingoloko gwelelo lyontumba, ina uthwa okulela ihe na thige po iilonga mbyoka,” ta fatulula ngaaka.

Sankwasa okwa ti, ito vulu okukala ho zi kOmuthiya ihe owu li kansela gwelelo lyOndangwa.

Mokavidio kamwe ka kwatwa koshifokundaneki sho One Africa, Sankwasa okwa popi kutya omukuluntu gwelelo lyondoolopa lyOmuthiya ke na omikalo nookansela melelo lyawo.

“Aakuluntuwiliki oye na okulela sha ikwatelela komilandu dha tulwa po ihe kashi shi ngaashi ya hala nokukala yaa na omikalo,” ta popi ngaaka.

Omukuluntuwiliki oha hogololwa kookansela onkene oku na okukala e na eihumbatonawa nookansela, ihe haku ihumbata onga oye omuhona gwawo.

Mokavidio moka okwa popi mo kutya melelo lyondoolopa lyOmuthiya omu na wo omaupyakadhi gokwaakwata nawa iimaliwa.

“Petrus Shuuya [omukuluntuwiliki gondoolopa] okwa ndopa wo okuulika olopota yelongitho lyoshimaliwa kookansela shoka she ya tula muudhigu okulonga, oshoka kaye shi mpoka ya thikama noshimaliwa,” ta ti ngaaka.

Sankwasa okwa indile elongelokumwe momalelo goondoolopa, yo ya yande omaupyakadhi ngoka taga shunitha monima iilonga.

Ta ti, uuna elelo lyondoolopa tali longele kumwe otali vulu okuhuma komeho nokulonga shoka shi li mondjila omolwuuwanawa woshigwana.

Onkambadhala okumona Shuuya naNdeutepo opo ya tye ko sha oya hulile muunyengwi sho itaaya kutha po oongodhi dhawo.

-vkaapanda@nepc.com.na