Pinehas Nakazikob
ǀAeǁgams-Tarekhoe ǁnae-aosis Namibiab !nâs ge mûsens rase supu tama hâ ǁîs a !gom tsî ǀgaisa ǁgoaǂuide !nāsa soagu !nâ !khōǂgā hâ amaga. !Nāsa ǁnae-aodi musik-i !harib ai hâdi ge ra mî, nē ǂharugub !nâ di ǁîde ǂhau!nâse ûi-ūhe tamasa hâsa aoresib nē ǂharuguba ǁgoeǂam hâ tsî !nāsa !nāde ǁîde !gôaǁnâ hâse i tsâsiba ra mā xui-ao.
Nausa, hâ !khais ge tare ǁnae-aos nî nē ǂharugub !nâ ai!gû tsî ǀgapise ǂharo ǂgaos kara os ǀgaisa ǁguiǂgāsens tsî ǀoasa ǀgaiba nî māsa, ǂgui ǁnae-aodi ra mîsa !oagu ǁîdi ǀōna !khōǁnâs tsî ǁgâis !ereamsa ra ūhâ aorekhoega ǁîde ǂgui ǀgaugu !nâ ra ǁgâiǁnâsa, aiǁgause sorosise ǁgoeǀhao-ūsa ǂgaoǀkhāhes khami. Dapne Willbards, Oteya ti ǀgui musik-i !harib ai a ǂansas, ǁgoeǂamaosis dande !kho!oa-aos tsî ǂanǂansa ǁnae-aos, !kharu ge !nona kurigu ǁaeba ǀguri hâse ra ǁnaes tsî Ogopa/Butterfly ǀons !naka ra ǂharugus ge a ǀgui. ǁÎs ge ǀgam albumkha ge māǂui, Ethimbob tsî Ondeyab hâkha, xawes ge ra mî supu tama i hâsa tare ǁnae-aose hâsa, Namibiab !nâ ǀguis ose xawe hoa !hūbaisise. “Sise ge ǀgam !nāra xa !nāsase nî sîsen aore ǁnae-aogu xa.
!Hao!nāsi ǁnaetigu xa ra !aromaheseb ge ǀhûhâsiba ǂhara ra mûde ra ǁgau, tarekhoes a ǁgû tsî ǁgâus tawa ǀgôana !nomsase nî kaikais asen ra mû xui-ao,” tis ge Oteyasa ge mî. !Gom a !gōsase !khais ge !khōdana-ao-ets nî ūhâ tama i o gu ra !gōsase aorekhoegu hîa hui-aose ra ǂgâxaga sorosiǁgoeǀhaosa tarekhoede xu ǂgaosa.
“Sise ge sorosiǁgoeǀhaos ǂhâxūse ra mûhe, ǁnā-amaga sise kaise a !gomba ǀgaisa tamats ka io nē ǂharugub !nâ mâhōsa, ǁgoeb !aromats !hasaradi ǀkha sâ kaihe tama ra ī amaga.”
Nau ǀkhāb ai noxopa hâ ǀgaisa !gomsib ge tarekhoedi ǁî!nāpe ǂkhâ!nâgu tama hâsa tsî surigu tsî ra !gôaǁnâgusa. “Tarekhoedi mâǀhao tsî ǂkhâ!nâgus ge buruxase tare ǁnae-aode nî omkhâi tsî ǀgaiba mā nē ǂharugub aoresib xa ǁgoeǂamhe hâb !nâ !kham!kharusa,” tis ge Oteyasa ge ǀamǀam.
Esmerelda Katjikurus, Esme ti ǀgui a musik-i !harib ai ǂansas tsî mâǂoa hâ ǁnae-aodi ǀguis ge ra mî, nausab nē ǂharuguba aoresib xa ra gaoǂamhe xawe di tare ǁnae-aodi tsîna !harode a sī!nâ ǁkhāsa ǀgaisase sîsens, ǁguiǂgāsens tsî ǁgū!kharus !nâ-ū.