Auleria Wakudumo 

Omukwaniilwa woshitunda shaNdonga Fillemon Nangolo okwa kumaida Ovanamibia va ha kale veli kolelela mokulonga oikulya omukalo woshikulu shonale ndele va hovele okulongifa omikalo doshinanena da yooloka okulonga oikulya yavo. 

Omukwaniilwa okwa patulula pambelewa oilonga yokuteya oihakautu yotete moshitunda shaNdonga. Oihakautu yotete oya tewa mofaalama yedina Agri Nest, mOkashana kUukongo waNehale mOmuthya. 

Omukwaniilwa okwa ti Ovanamibia unene ovo veli konooli yoshilongo ova pumbwa okulonga oikulya yavo vene opo va kandule po omhumbwe yoikulya nondala moshilongo. 

Okwa ti oule wefimbo Ovawambo ova kala veli kolelela moilya onga ouxupilo wavo. 

“Otwa hala okuulika kutya keshe shimwe otashi dulu okukunwa monooli. Ovatali vedu ova holola nale kutya edu olina oushosho wa wana okukuna oikunomwa ya yoolok okudja koTsumeb fiyo Okashana,” Omukwaniilwa ta ti. 

Otaku hokololwa oihakautu ei ya kunwa pehovelo lomudo neudo. 

Ofaalama yoAgri Nest oyina oule weehecta 50. Agri Nest okweshi pondola okukuna oihakautu meehecta nhee odo da yandja oihakautu omayovi onduba. 

Ofaalama oina yo ombinga yomapungu, omahangu, oilyavala oshoyo oikwambidi ngaashi ombidi yokoushimba, eenyanga, ounakanamudesha naikwao ya wedwa po. 

Ofaalama ei oya kuta ovanhu va koya po100. 

Omudo waya, Omukwaniilwa okwa li a yandja edu koohandimwe ovo va tokola okulonga nokukandula po ondjala moshilongo. 

Omukwaniilwa okwa ti okwa ninga etokolo eli opo Ovanamibia va xulife po okukufa oikulya kodje yoshilongo. Okwa ti oikulya otai ka kala yakeshe umwe moNamibia. 

Ngoloneya woshitukulwa shaShikoto Sacky Kathindi naye okwali umwe womovaleli va fika pepatululo pambelewa loihakautu mofaalama yaAgri Nest. 

Kathindi okwa holola kutya Namibia okuna edu lina oushosho wa wana okukuna oikunomwa ya yooloka. 

“Ovanamibia ova pumbwa okulongela kumwe opo va kwafafane okulwifa ondjala nomhumbwe yoikulya moshilongo,” Kathindi ta ti. 

-wakudumoauleria@gmail.com