OSHAKATI – Ngoloneya omupe gwoshitopolwa shaShana Hofni Iipinge okwa uvaneka kutya oshili, elongelokumwe nombili otayi ka dhana onkandangala mehumokomeho lyoshitopolwa shaShana. 

Iipinge okwa popi ngaaka ohela esiku kwa li ta taamba ko oshipatululo shombelewa ye okuza kungoloneya omukulu Elia Irimari, poombelewa oonene dhoshitopolwa shaSshana mOshakati. “Ehumokomeho nekandulepo lyomaupyakadhi ga taalela oshitopolwa shika, otaga holoka ashike uuna tatu longeleni kumwe, onkene otandi ithana aaleli ayehe osho wo oshigwana opo tu longeleni kumwe,” ta popi ngaaka. 

Iipingeokwakwashilipalekekutya shoka sha shangwa momushangwa gwembo embulau lyoSwapo otashi tulwa miilonga, ngaashi naana sha uvanekwa. “Otandi indile oshigwana ashihe mOshana opo tu longeleni kumwe tu vule okueta elunduluko nehumokomeho osho wo tu longeleni aakalimo yetu uuwanawa,” ta indile ngaaka. Irimari okwa ti okwa kala nokupulwa kutya sho iilonga ye ye ya pehulilo oyu uka peni, okwa yamukula kutya oshilongo oshi na oompito odhindji noomweelo odhindji odha patuluka natango. “Kehe shimwe oshi na etameko nehulilo, ashike otandi thigi po iilonga mbika nomwenyo gu udha enyanyu omolwomalunduluko twa eta mo okupitila mokulela kwandje,” ta popi ngaaka. 

Sho ta gandja oshipatululo okwa londodha ngoloneya omupe a landule moompadhi ndhoka e enda, oshoka ye ina pogola osho wo ina hala wo naye a pogole. Nandi- Ndaitwah sho kwa li a taamba ko oongoloneya ayehe okwa kunkilile ya ka longe nuudhiginini yo ya itule mo miilonga yawo ngaashi naana yi na okulongwa. “Tamekeni nooproyeka dhongushu miitopolwa yeni opo mu vule okukandula po oompumbwe dhiilonga osho wo omaupyakadhi ga yooloka ga taalela iitopolwa,” ta kumagidha ngaaka. 

Oongoloneya aape oyo, Pijoo Nganate gwOmaheke, Kadiva Diana Hamutumwa gwOhangwena, Iipinge gwOshana, Natalia Goagoses gwErongo, Dorothy Mareka- Kabula gwoZambezi, David Gertze gwoǁKharas, osho wo Immanuel Shikongo gwOmusati. 

Ehumokomeho 

Hamutumwa okwa popi kutya ota ka longa pamwe naanyasha ye na iitalendi ya yooloka, uunamapya, eetepo lyiilonga osho wo ehumokomeho. 

“Otandi indile wo aakalimo yomOhangwena opo tu longeleni kumwe tu yambule po nokuhumitha komeho oshitopolwa shetu,” ta popi ngaaka. 

Nganate okwa pandula sho a pewa ompito yokulela oshitopolwa, ta ti, ota ka longa nuudhiginini opo a humithe komeho oshitopolwa shOmaheke.“Omangandakalatandi kondjitha okuhwepopaleka onkalo yondjala okupitila muunamapya, iilonga nosho tuu, ethimbo opaife oku yi tula miilonga,” ta popi ngaaka. 

Kabula okwa ti, tango ota tula miilonga uunamapya, omapashiyono osho wo eetepo lyiilonga. “Oshitopolwa shaZambezi oshi na evi ewanawa nomeya okuza momulonga onkene otu na oku yi longitha opo tu kandule po uupyakadhi wa taalela oshitopolwa shetu,” ta ti ngaaka. 

Shikongo okwa ti, ota ka tula miilonga omalongo osho wo iigongi naaleli ya yooloka moshitopolwa shaMusati opo ya kale taya kundathana nkene ye na okukandula po omaupyakadhi ga taalela oshitopolwa. 

“Oshitopolwa osha taalelwa komaupyakadhi ga yooloka, ngaashi gokwaa na oondjila, iipangelo, oosasiona dhopolisi, omakuthiikuthi niikwawo oyindji,” Shikongo ta totha mo ngaaka. 

Gertze gwo||Kharas okwa ti oshitopolwa osha taalela unene uupyakadhi wevi, shoka sha etitha wo ondjala moshitopolwa.– vkaapanda@nepc.com.na