Ovaneumbo ve li 13 ova tembukila koshitaasi shopolifi kEndola konima eshi omulumenhu wambulavo weedula 37 e na oudu wopamadiladilo e livaka moshipangelo ndele ta kufa ekuva a hala oku va dipaa.
Oshiningwanima osha ningwa Omaandaxa komukunda Omutemo koshikandjohoololo shEndola moshitukulwa shaHangwena.
Omupopiliko wopolifi moshitukulwa shaHangwena Warrant Andreas Nghiyolwa okwa koleka ta ti omulumenhu ou okwe livaka koshipangelo shaShakati Osoondaxa efimbo loufiku.
Opolifi oya hokolola tai ti eshi a fika meumbo okwa kufa ekuva a hala okudipaa ovaneumbo vaye mwa kwatelwa ina nainakulu. Otaku hokololwa kutya omulumenhu ou okwa ninga eemwedi mbali a tambulilwa kosaala yovanhu ve na oudu wopamadiladilo.
Opolifi oya hokolola tai ti ovaneumbo ova ninga onghendabala yokutembukila koshitaasi shopolifi molwaashi okwa li va tila okudipawa. Otaku hololwa kutya omulumenhu ou oha kwatwa oshimaliwa shopendjela ashike ohe shi kwatelwa kuina.
Vati efiku a fika meumbo okwa fikila ta pula oshimaliwa shaye ndele ta popi kutya ngeenge ina pewa oshimaliwa shaye ota dipaa ovaneumbo vaye.
Opolifi oya koleka tai ti omulumenhu ou okwa kwatwa po nokushunwa koshipangelo kOshakati. Eshi a kwatafana naKundana omukulunhuwiliki woshipangelo shaShakati Dr Ruben Kanime okwa ti osaala yovanhu ve na oudu wopamadiladilo oya taalela eshongo linene lovanailonga inava wana okukala tava tonatele endiki olo.
Okwa yelifa ta ti osaala yovanhu ve na oudu wopadiladilo oi hadi neenghono osho sha eta ovanailonga va longe noudjuu shaashi kashipu okutonatela ovanhu ve na oudu wopamadiladilo.
“Ohatu longifa ashike ovakeleli vomaliko ashike inava wana,” ta ti.
Kanime okwa ti otashi kwafele ngeenge epangelo ola tungu oshipangelo shakula shokukala ovanhu ve na oudu wopamadiladilo shaashi osaala yomOshakati oishona.
Okudja omudo wa dja ko koshikandjohoololo eshi shi li moshitukulwa shaHangwena omwa lopotwa ovanhu vatano va xulifa, nounona vavali va lemanekwa neenghono eshi va tetwa nomakatana kovakwapata vavo ovo hava tukulukilwa koudu wopamadiladilo.
Omwedi wa dja ko komukunda Oshikwiyu moshitukulwa shaHangwena okwa lopotwa omukulupe weedula 88 a dipawa komutekulu waye e na oudu wopamadilaadilo omanga ounona vavali va lemanekwa. Natango omwedi wa dja ko, koshikandjohoololo shaNdola okwa lopotwa omulumenhu weedula 35 e na oudu wopamadiladilo a xwika po eenduda meumbo, omo natango kwa li ekwete eonga a hala okudipaa ovaneumbo vaye.
Natango neudo, komukunda Okapumbu, koshikandjohoololo Ongenga okwa lopotwa omulumenhu weedula 30 e na oudu wopamadiladilo a dipaa xe weedula 64 konima eshi e mu kutula omunino nombele. Komukunda Eengwena koshikandjohoololo shaNgenga natango okwa dipawa omukulupe a dipawa komutekulu waye e na oudu wopamadilaadilo. Omudo wa dja ko natango koshikandjohoololo Ongenga okwa lopotwa omulumenhu ou e li pata wongeleka yaCatholic koRundu a dipaa outekulu vavali konima eshi e va denga omitwe mosamende.
Omulumenhu ou weedula 39 naye oku na oudu wopamadiladilo.
Konima yeemwedi nhatu, omulumenhu weedula 27 e na oudu wopamadiladilo okwa twalwa koshipangelo konima eshi kwa li a hala okudipaa xe naina komukunda Onghala B moshitukulwa shaHangwena onghela.