NKURENKURUS – !Kharaga !garo!ā ǁanǂgāsaben Mpungu ǁhûi!nâǂharis, Kavangob Huriǂoas ǀkharib !nâ ǁgoes din ge, ǁî!nāpe !nansa ǂnuwi tsî !naokurus projeks hîan ‘Mutjima-gumwe Woodworking Cooperative’ ti ǂgai hâs ǀkha ge tsoatsoa. Nē !nans ge Namibia Integrated Lands cape A pproach for Emhancing Livelihoods and Environmental Governance (NILALEG) Nkulivere projeks !nâ-ū ge tsoatsoahe. Nē projeks !nakan ge ǁanǂgāsabena hain tsî !naona xu xūna kuru tsî ǁamaxūsa xu ra ûi. NILALEG projeks ge omkhâisensa ǀhûhâsigu !nâ ǁawoǁawos ai !gaoǁgui hâ. Nkulivere projeks ge ǀhûhâsigu ai a !gao!gaosa projekna ra !amǂgā, ǁîna ǂkhâ!nâs ǀguisa dī tama hâ xawe !garo!ā ûiǀgaugu tsîna ra ǀgaiǀgaise. 

Nē projeks ge !kharaga dīǀgaugu !nâ-ū ra !khōdanahe, ǁîgu hîa ǀkharib !nâ hâ ǀō-aisa ǂhâsiga gowaǀîs ai a !gao!gaosagu ai. ! Nao!gao-aon ǀHûǁares, ǀgūǁae ge a kuruhe !naokurus sîsen!khaib hîa Mpungu ǁhûi!nâǂharis tsî ǀKharisi Direktorats Haiǂgās berodi xōkhā ǁgoesa xu ra domdore. 

“Sida ǂnûiǂgās ge 18 ǀhûhâsisa ǁanina xu a !amǁaresa, ǁîn hîa nēsi !ā!nāsisen ra kuru xūna ǁamaxūsa ra !khōdanana. Nē projeks, Mutjima-gumwe !Naokurus Sîsen!khaib ti a ǂansab di aiǂnû-aob, Johannes Ndumba Kaleyib, ge ǀgūǁae Nkurenkurus ǁGauǂuidi nâ NILALEGS !nâ-ū gere ǁhao. “Sida ge nē projeksa ǂgiǂgosi ǀawemā-aob beros !nâ-ū ge !khō!oa. 

ǁÎn huib ǀkha da ge ǁanina hō tsî guipa ge sîsentsoatsoa. ǁKhātin ge hoa ǂhâbasa huisenūxūna mā da tsî ǂhâbasa ǂkhanin tsîna ge dītoaba da. NILALEGs ge sîsenǁareǁkhāǁkhāsende ge mā da, mâtits ǂharuguba nî !khōdanas tsîna !khōǂgā hâse. 

Nēpa xu da ge sida ǁî!nāpe !kharaga !harode ge māgu, aigause aiǂnû-ao-e xu marin ǀkha nî sîsen khoe-i kōse,” tib ge ge mî. Nē projeks ge !kharaga gauga !khōǂgā hâ tāgu, ǂnû-ai!naon, kharon tsî hoa om!nāxūn !naon ǀkha ra kuruhen tsîna. 

ǁKhātin ge !naon ǀkha a kurusa mûǂuidao ǁguiǂuigu, daodi tsî ǁkhō!nâs kāgu tsîna ra kuru. “Sida projeks ge koro kurigu !kharu hâse ge ǂnāǁnâ, xawe da ge Covid-19 ǁōs di ǀgam kurikha !nâ xū-e ge dī tama hâ i, tsî ǁnā-amaga noxopa khaohâro hâ, ǂoa ge kurib !nâ ǀgui da ge ǁkhawa ǀāxū-ammese a tsoatsoa xui-ao. 

Sida ǂnôa-ū gaiusa ǁgoaǂuis ge !naona hōsa, ǀaen tsî haina ǁhāsa da mā-amsa tama hâ amaga. Horahus ǀgaub hîa da !naona a hō ǁkhāb ge, haiǂgās beros !nâ-ūs ǀguisa.