Omupopiliko wopolifi moshitukulwa shaHangwena Warrant Andreas Nghiyolwa okwa ti oshiwana otashi longo nelitulemo okulongela kumwe nopolifi okukandeka oimbuluma moshitukulwa.
Okwa ti oshiwana ohashi holoka momwaalu muhapu okuyandja ouyelele kopolifi kombinga yoimbuluma tai longwa.
“Otu na oimbuluma ya yooloka ya longwa omo opolifi kwa li tai pula ekwafo koshiwana, novafekelwa ova kwatwa po konima eshi oshiwana sha yandja ouyelele,” ta ti.
Okwa pandula oshiwana molwokulongela kumwe nopolifi okukandeka oimbuluma shaashi otashi kwafele oimbuluma i shune pedu. Nghiyolwa okwa yelifa ta ti oimbuluma otai ka dengwa noupu ngeenge oshiwana tashi longele kumwe nopolifi.
Okwa ti ngeenge opolifi tai ningi oyoongi komikunda oshiwana ohashi holoka momwaalu muhapu okutopolelafana omayele nopolifi.