ONGWEDIVA – Ovanhu monooli itava ka enda vali oshinano shile okupangwa omukifi wokaangela koWindhoek molwashi paife mOngwediva ota mu tungwa endiki lipe loNamibia Oncology ta li ka yandja omayakulo opaunamiti.
Ngoloneya woshitukulwa shaShana Hofni Iipinge pamwe novambelewawiliki va dja kehangano loNamibia Oncology ova patulula pambelewa onghela oilonga yokutameka okutunga endiki eli.
Endiki ota ka patuluka pambelewa momudo tau ya momwedi Juli. Ota li tungwa kongushu yoshimaliwa eemilionaN$150.
Ngoloneya waShana Iipinge okwa ti endiki e li ota li ka etela ovanhu monooli omauwa molwashi paife itava ka enda vali oshinano shile okuya koWindhoek va pangwe okaangela.
Okwa ti okwa hala okumona oilonga ya tameka meendelelo okutunga endiki eli shaashi ola fimana moshiwana.
“Ei onghundana iwa shaashi endiki ota li ka yandja omayakulo opaunamiti a yooloka kovanhu tava di koitukulwa yomonooli,” ta ti. Okwa pula ovanhu tava tungu endiki opo va yandje eemhito doilonga kovakalimo vomoshitukulwa shaShana.
Omukulunhuwiliki woNamibia Oncology Dr Anthea van Wyk okwa ti otava lalakanene okueta omayakulo opaunamiti popepi noshiwana.
Okwa ti endiki lavo lili koWindhoek oha li ya kula omwaalu muhapu wovanhu tava di konooli tava ka pangwa nokuningilwa omakonakono okaangela.
“Otwa didilika kutya mboli osha fimana ngeenge otwa tungu endiki monooli opo tu yandjaneke omayakulo etu koshiwana monooli,” ta ti.
Ndayelekwa Kayofa a dja koshitukulwa shaHangwena noku li umwe oye a ninga eemwedi omuwoi ta pangwa omukifi wokaangela kendiki lokoWindhoek okwa ti okwa pandula molwomayakulo mawa opaunamiti a pewa keendotokola.
“Tete okwa li nda kanifa omukumo ashike onda ya keendokotola tadi longele koNamibia Oncology nonda kala ndi li momake mawa,” ta ti.
Okwa kumaida ovanhu opo va kale ve na omukumo ngeenge va monika okaangela nokukala tava ka pangwa kendiki e li shaashi oha li pange moshili.