Ambrosius Mathias Muyeu weedula 27 okwa anyenwa omhito yoku li futila mo modolongo shaashi ta tamanekwa kutya okwa dipaa xekulu nainakulu nekuva.
Meyeu okwa holoka momangulilo yaKahenge Omaandaxa.
Oshibofa shaye osha undulilwa komafiku 7 October 2025 nelalakano lokuyandja omhito ku ningwe omakonakono omoule.
Okwa lopotwa oshingwanima shikumifwa eshi sha ningwa Etitano komukunda Kayeura moshitukulwa shaKavango West efimbo lomutenya.
Oonakufya ova tongolwa ovo Hamukwaya Clemens weedula 79 naMaria Mukuve weedula 84 ovakalimo womomukunda Kayeura.
Omupopiliko wopolifi moshitukulwa shaKavango West Chief Inspector Rambert Muronga okwa hokolola ta ti omufekelwa okwa dipaa ovakulupe shaashi vati have mu pondo ngeenge a kofa.
Opolifi yelifa tai ti omafyo ovakulupe okwa etwa koshikumungu shoulodi.
Opolifi oya hokolola kutya omufekelwa okwa kufa ekuva ndele ta tete inakulu naxekulu nokuxulifila ponhele opo.
Ota ku hokololwa kutya omufekelwa okwa kala nokulundila ovakulupe kutya ohave mu pondo. Omufekelwa okwa kwatwa po nota pangulilwa oshibofa shedipawo lovanhu vavali.
Okwa didilikwa oikungu yomaulodi tai teya po eefamili omanga ovanhu vamwe ohava longele ovakwapata vavo ominyonena molwomipopyo doulodi.
Opolifi oya ti ovanhu vamwe ihava kala ve na ouyelele we lixwapo kutya ota liwa shi li kuinakule ile kuxekulu osho shi li shapuka okulundila omunhu kutya ote kuli.
Opolifi oya ti eengeleka doiveva neendudu nado ota di pukifa oshiwana molwashi ohadi lombwele ovanhu kutya ota liwa kunhumba.