OSHAKATI – Uuministeli wetanga lyegameno owa pititha omushangwa okuyelitha shoka tashi nyenyetwa komalungula kutya oshike omunyekadhi Aldeheid Nangola a falwa nedhakadhaka lyepangelo komathigathano gokakadhona dhingi Okanamibia 2025.
Omathigathano ngoka ga ningwa mehuliloshiwike oga ningilwa momauliko giipindi mOngwediva moshitopolwa shaShana.
Uuministeli wetanga lyegameno owa fatulula kutya omukulukadhi gwomukwaniilwa gwOndonga Fillemon Shuumbwa Nangolo, opamwe nomukwatelikomeho gomathigathano gokakadhona dhingi, Umbi Karuaihe-Upi, oya li ya falwa kehala hoka kwa ningilwa omathigathano nokadhakadhaka ketanga lyegameno sha landula eyindilo lya ningwa kaalongekidhi yoshiindingil NBC.
Ya shanga kutya oshiindingili shokakadhona dhingi Okanamibia oshinene mondjokonona yaNamibia, shoka hashi ulike omaunyakwa nomithigululwakalo dha yooloka moshilongo mbyoka hayi ulikwa wo kiilongo yilwe.
“ Oshimaliwa shapulwa okulongitha okadhakadhakadhaka hoka osha li sha thika konyala poshimaliwa N$25 000. Kashi li mondjila okupopya nayi komalungula omanga pe na uyelele wu li po,” ya fatula ngaaka.
Uuministeli owa yelitha kutya aalongekidhi oya li ya pula pambelewa okuthindikilwa nokadhakadhaka ihe kasha shi omunyekandhi a thindikilwa oye awike.
Epapa lyokakadhona dhingi olya sindanwa kuJohanna Swartbooi gwomimvo 24, ngoka a mana eyilongo lye ongahahende koshiputundhilo shopombanda shaUnam.
Oshiindingili shoka osha li aanenentu ngaashi Omupevipresidente Lucia Witbooi, minista gwomauyelele Emma Theofelus, omukuluntu gwo-NBC Stanley Similo, osho wo aanangeshefa ya yooloka.
Shika okwa li oshikando shotango oshiindingili shi li ngeyi tashi holoka konooli nosha li sha hili lela oshigwana oshindji.
Similo okwa li a holola enyanyu nohokwe omolwoshiindingili sha ende nawa ngaashi naana kwa li ya tengeneke.
“Elalakano lyetu okufala oshiindingili shokakadhona dhingi ki i topolwa ay ihe moshilongo,” ta popi ngaaka.
Ta ti, shoka sha holoka Olyomakaya osha holola uukumwe, uunyakwa osho wo ohole yokakadhona Okanamibia.
Similo okwa okwa pandula wo omahangano osho wo aanangeshefa nakehe ngoka a li a yambidhidha ethigathano lyokakadhona dhingi.
-vkaapanda@nepc.com.na