SANGWALI – Sikolo sa Sangwali sesi kopanyize litopa nesifumani neulo ya miyaho ye minca kuzwelela kwa kampani ya Namibia Fish Consumption Promotion Trust (NFCPT) cwalecwale. Hala neulo ki makilasi amalalu, muzuzu wakubuluka libyana, ni muyaho wakamaiso ona ni lika kaufela. Zeo kaufela neli yahilwe kasinyehelo ya masheleñi alika lule ni likiti ze myanda yelobañwi (N$1.9 million).

Hana bulela kanako yakutambeka miyaho yeminca, muzamaisi wa kampani ya NFCPT Victor Pea naize kasamulaho akubona maswaniso abanana balutelwa mwatasa’ kota mwa kweli ya Sope 2023, ili nako ya litabula banyungiwa maikuto akuli batuse.

“Kwa kampani ya NFCPT lulumela kuli tuto kona mutomo wakucinca mayemo abatu. Kikalibaka leo mwamungendenge waluna wakukutiseza sicaba, lulwanela kutusa sicaba. Kasamulaho akulemuha masulungundu abaituti sapili nelu neuzi matente kuli ato tusa onafo feela. Kanako yeswana lwakala kupolokosha lika kuli kuyahiwe miyaho ye inelezi,” nekubulezi Pea.

Nabulezi hape kuli yena kasibili ukile apotela sikolo mwakweli ya Muyana 2023, mi ato lemuha maticele bakutumani mwa ofesi ye nyinyani, yomuhulu wasikolo nasebelisa muzuzu wakubulukela lika. Kasamulaho akulemuha tokwahalo yeo ba ekeza muyaho wakamaiso kwa project. Kiha baswalisana ni kampani ya NIMT ni Reality Investments kubona kuli purojekiti ya ezahala. 

Mwa manzwi ahae muinasipula wa kampani ya NFCPT Suzan Ndjaleka, naize kutambeka muyaho neli talelezo ya pono ya kuli mwanana kaufela mwanaha Namibia una ni tukelo ya kufumanela lituto mwa silalanda se si lukela. “Ki bupaki kuli miyaho ki yabutokwa. Miyaho yetahisa pukelezo, yena ni lika kaufela, teñi baituti baikutwa hande haitahisi feela kuli batabele kukena sikolo, kono itahisa kuli baeze hande mwalituto zabona,” nekubulezi Ndjaleka.

Mwa manzwi ane abalilwe ki muyemeli wa silalanda sa Judea Lyaboloma Humprey Divai, mubusisi wa sikiliti sa Zambezi Dorothy Kabula naitumezi kwa kamaiso ya kampani ya NFCPT kakuotolola lizoho nikutusa sicaba sa naha Namibia. “Nibata kuitumela kwa kampani yelekisa ni kubabaza litapi kapono ya teni. Kubabafumani tuso ni misusueza kusebelisa hande zemufumani, mulibelekise kuba licwe la kukambamela kumbweshafaza bupilo, kusebeza katata, nikususueza baba mi potolohile,” nekubulezi Kabula.

Yomuhulu wasikolo sa Sangwali Esnart Simobe nasakoni kupata tabo yahae hala miyaho yeminca. Naize neulo netile inge basika itekela mi natilo bona feela baetapili bakampani ya NFCPT habato potela sikolo mwa kweli ya Sope 2023. Naize kamaniti limbuyoti za Mulimu za beleka mi halobali. Naitumezi hahulu kwa kampani ya NFCPT, mi naize naitumezi hahulu sihulu kamuyaho wakamaiso. 

“Nekusi bunolo kuyozwa kwasikolo kone nibelekela kone nina ni ofesi kuto belekela mwa muzuzu mokubulukwa libyana. Lilimo zebato likana zepeli nesi nto yebunolo. Mane nese ni siyanga munyako ukwaluhile kuli babata lika mwamuzuzu mokubulwa libyana bano kena feela basa ngongoki. Mwakona kunahanisisa mose ni ikutwela fa,” nabulezi kabuitumelo. Naize sikolo sisa talimani ni matata amañwi acwale kakutokwa lipula ni matafule, lukwakwa lwa sikolo, mwakubuluka libuka, hamoho cwalo ni labalatoli. Kanako yacwale sikolo sina ni baituti ba 346 ni babeleki ba lishumi kabalobapeli.