OSHAKATI – Aantu anuwa otaya ende shokadhi kowishi okwiinyolitha uukalata womahogololo mOshakati. Omashango guukalata womahogololo ga gwedhwa po, oga ningilwa unene aantu mboka yakanitha uukalata nenge opo yagwanitha oomvula 18. Ashike yamwe yomaakalimo mondoolopa yaShakati otaya ti kaye na ontseyo ngele nuumvo okuna okwiinyolitha kuukalata womahogololo. 

Anuwa yamwe oyali ya kumwa anuwa sho ya tala ootenda dhomahogololo dhili momindhingoloko dhawo oshoka kayeshi shoka tashi ningwa po. Oshifokundaneki shika sho sha talele po oosenda mOshakati, dhimwe ka kwali dhi na nando omuntu gumwe omanga dhimwe dhina ashike omuntu nenge yaali. Aakwateli komeho yoosenda dhomahogololo mOshakati oya ti aantu otaya ende kashona oshoka oyendji oya inyolitha nale omanga yamwe kayena natango ontseyo kutya okuna omayinyolitho. Matias Shikalepo gwomolukanda Oneshila okwa ti, kena ontseyo ngele okuna omayinyolitho guukalata womahogololo.‘‘Sho tandi popi ngeyi kandi na sha okakalata komahogololo oshoka omumvo gwa ziko ka kwali nda mono ompito yokwiinyolitha, ashike ngele nani ota kwiinyolithwa ishewe, otandi yi’’ ta popi ngaaka. 

Carolina Ekongo ngoka opo a gwanitha omimvo 18 nuumvo muMalitsa okwa ti ina uva ngele okuna omayinyolitho, ashike okushishi kutya okuna omahogololo nuumvo. ‘‘Okwali ndishi itaku ningwa omayinyolitho ishewe nuumvo oshoka ogali ga ningwa omumvo gwayi. Nani nda ningi omunelago oshoka ka kwali nda gwanitha omimvo 18, sho kwali kwa ningwa omayinyolitho omumvo gwayi’’ ta popi a nyanyukwa. 

Malakia Shivute ngoka a li ta hogolola poshiputundhilo oshinene shaUnam mOshakati okwa ti, oyendji kayena ontseyo kombinga yokwiinyolitha uukalata womahogololo natango.“Otandi gandja ombendhi kokomisi yomahogololo oshoka inayi andjaneka uuyelele wagwana koshigwana ngaashi kwali sha ningwa omumvo gwayi” ta nyenyeta ngaaka. Ta ti, nonando kapena aantu mpaka oyendji kayena natango uukalata wokuhogolola. Omainyolitho ngoka taga ningwa omasiku geli o10 oga tameke Omaandaha, no taga ka hula momasiku 19 Aguste. 

ECN okwa pititha omushangwa kutya omayinyolitho ngoka oga nuninwa mboka yaana uukalata womahogololo, mboka yewu kanitha oshowo mboka ka kwali ya gwanitha omimvo 18 sho kwali kwa ningwa omahogololo gopaupresidente omumvo gwa zi ko. “Ompito ndjika itayi endulula, ihe otwa hala kehe gumwe a mone ompito yoku ka hogolola momahogololo ngoka ga tengenekwa ga kale ko nuumvo,” ya nyola ngaaka. 

Omunambelewa omukuluntu mokomisi yoECN Peter Shaama okwa ti, aantu otaya ka pitikwa ashike okwiinyolitha miikandjohogololo moka haya zi ethimbo ndika, moka tayaka hogololela natango. 

vkaapanda.nepc.com.na