Auleria Wakudumo 

Ombelewa yaMayola wodoolopa yaHelao Nafidi mekwafelo lovanangeshefa noohandimwe modoolopa oya yandja ekwafo loikwafifohongo neemhumbwe dikwao keefikola nhano odo di li momudingililo wodoolopa yaHelao Nafidi Etivali. 

Mayola Darius Shaalukeni okwa yandja oututa vounona voukadona ve li 5 000, oudalateh ovo hava longifwa okutula kumwe eembapila ve li 20 000 osho yo eepena dekala di li 300. 

“Ekwafo eli ola nuninwa ovanafikola unene ovo ve li momhumbwe osho yo eefikola odo da pumbwa ekwafo ngeenge tashi ya koilongifo yehongo,” Darius ta ti. 

Eefikola odo da pewa ekwafo ongaashi Shaama Primary, Etale Combined, Edundja Secondary, Nakambuda Combined nOnengali Combined. Shaalukeni okwa holola kutya ovahongwa voukadona vamwe unene ovo ve li momhumbwe ohava kala va taalelwa keshongo lakula okuya kofikola vehe na oututa. 

“Eshi ohashi eta va kale inava ya kofikola oule wefimbo olo vehe na oututa. Onghene, ohandi yandje ekwafo eli ndi kwafele ovahongwa ava opo va kale mofikola,” Shaalukeni ta ti ngaho. 

Shaalukeni okwa ti ekwafo eli otali kandula po omikundu dihapu odo da taalelwa kovahongwa nokeefikola dihapu moshitukulwa shaHangwena. Okwa weda po ta ti eefikola ohadi kala da nyengwa okuwanifa po eemhumbwe dovahongwa aveshe molwoshimaliwa. 

Shaalukeni okwa twikila ta ti osha fimana okukwafa eefikola pauhandimwe, mwe litula oukuni kumwe ile omahangano onhumba opo omwaka oyo ya kula i li mehongo i dule okufitikwa kukeshe umwe ndele hakepangelo ashike. 

Okwa ti ovadali vamwe ohava nyengwa okulandela ounona eemhumwe dopetameko ngaashi eepena domakala shaashi ve li momhumbwe, eshi ohashi eta yo ofikola i kale itai dulu okulanda oipumbiwa aishe yovahongwa molwouhapu wavo. 

“Eepena edi otadi kwafele ovahongwa vopedu opo ve lihonge okulongifa eepena nokukala va pyokoka mokushanga,” Shaalukeni ta ti. Shaalukeni okwa yandja yoo ekwafo la yooloka ketungo lomuhandjo wofikola Shikudule Combined moshi tukulwa shaHangwena. 

-wakudumoauleria@gmail.com