Auleria Wakudumo
Omhangu yopombada yaShakati oya mona David Ameya Ndalikutala ondjo moibofa itatu eshi vati a ponokela, okunyeka nokudipaa omuyandji woilonga womukainhu waye. Ndalikutala okwa ponokela nokudipaa Johannes Iita edipao linyanyalifa eshi e mu twa nombele oikando ihapu monhulo, momutwe nokolupanda momafiku 3 Novemba 2016. Oshiningwanima eshi osha ningilwa meumbo laIita, momukunda Okashana kaKamanya mOmuthiya.
Otaku hokololwa nakudipaa ou a hangwa meumbo lanakufya monduda yomukainhu waye oo a li omunailonga womeumbo pefimbo loshiningwanima eshi. Iita okwa lombwela Ndalikutala opo a dje mo meumbo laye, ashike ponhele yokufiya po eumbo lovanhu okwa ponokela mwene weumbo noku mu twa neembele.
Ndalikutala naye vati okwa li ha longo ongomunailonga womeumbolimwe momukunda omo tuu omo.
Omhangu oya mona yo Ndalikutala ondjo moshibofa sheteyo leumbo nokuvaka oinima yovanhu eshi e liteela monduda meumbo lomuyandji waye woilonga ndele ta kufa mo eembele nhatu.
Imwe yomeembele oyo a longifa okudipaa Iita. Eshi a pulwa ngeenge oku na ondjo moibofa itatu oyo a patululilwa, Ndalikutala okwa ti ke na ondjo moibofa yotete ivali ashike oku na ondjo moshibofa shedipao, nonande vati e shi ninga kwa li te lipopile. Okwa holola kutya okwa li e li mekwatafano lopahole nomunailonga womooIita.
“Onda li handi dulu okunangala monduda omo hamu nangala kakadona wange. Efiku olo onda fiwa komukainhu oo wange kange a ka longa oilonga yaye shaashi okwa li kwasha. Iita okwe ya ta pula ou e li meumbo laye nokwa pondola okuuya monduda manga ashike handi kendabala okungumuna eedopi donduda opo ngeno ndi faduke po,” Ndalikutala ta dimbuluka.
Ndalikutala okwa twikila ta ti vati Iita okwa ponokela monduda nodibo ndele temu lemaneke nayo. Okudja opo vati okwa pondola okukufa ko odibo ndele tei mu dengifa opo ngeno vati e mu efe.
Mokupolokosha kwavo, Ndalikutala vati okwa toola ombele ya li popepi ndele te mu tu fiyo vati ta ongotele kombete.
Otaku hokololwa kutya vati Ndalikutala okwa faduka po konima yoshiningwanima osho ndele ta i keumbo lavo, te likosho eehonde nokuyaula okandjato kaye ndele ta faduka po vati a ya moAngola.
Omushiinda shanakufya, Gloria Nhihulu okwa yandja oumbangihokololo waye kutya okwa uda ovanhu tava kuu lwopo 18h00 mu3 Novemba 2016.
Nhihulu okwa ti ota dimbuluka kutya eshi va fika poshiningwanima namukwao umwe ova hanga Iita e li koshi yekungu lohonde. Okwa ti okwa mona omafalukunwa taa ulike kutya ovanhu ova li tava lu nodibo ya teka. Nhihulu okwa holola yo kutya eshi va ninga omapekapeko a wedwa po ova mona kutya eedopi donduda dimwe vati oda ngumuninwa pondje.
Nakuyandja oumbangihokololo umwe vali, Immanuel Amoomo, omushingi wotaksi, okwa holola kutya okwa lefwa kuNdalikutala okudja momukunda wavo a uka kOmuthiya. Okwa ti Ndalikutala okwa lefa okudja mepya leumbo lavo ashike olutu noikutu oya tuta koshinwi a fa ashike vati omunhu e lidenga momeva.
Okwa twikila ta ti Ndalikutala okwa li nokambidja kaye peke nokwa djala ounghaku voutapa. Eshi va fika mOmuthiya vati Ndalikutala okwa yambuka mo motuwa oduduluko ina futa noshimaliwa shovanhu. -wakudumoauleria@gmail.com
Efano: The Namibian