Auleria Wakudumo 

OSHIKANGO – Minista wemona neependjela Ericah Shafudah okwa kumaida ovanambelewa vaNamibia Revenue Agency (NamRA) opo veli kaleke kokule nokutambula ombubo okudja koohandimwe opo va pitife oilandifomwa shihe li paveta. 

Pefimbo ta talele po ovanailonga vaNamRA kOshikango, Minista okwa holola yo ehafo eshi oibofa yovanambelewa ya shuna pedu. Okwa ti eshi oshishi okupandulwa nokwa indila aveshe opo va wanenwe keendjabi davo. 

“Ohashi kala shififa ohoni ngeenge omunambelewa ta tulwa moipandeko shaashi a futwa opo a dule okulonga oulingilingi. Kape na ou a hala okukanifa omunailonga pamwe naye momukalo watya ngaho,” Minista ta ti. 

Shafudah okwa ti ota pandula ovanailonga vaNamRA eshi tava longo oufiku nomutenya okukwashilipaleka kutya ova keelela oinima aishe oyo taiya moshilongo inai pitikwa ile oyo tai vakelwa mo, inai futilwa. 

“Elitulemo leni moilonga otali hololwa koinima oyo ya kwatwa ko oshoyo oimaliwa tai uya mo okudja koinima tai piti peengaba,” Shafudah ta ti. 

 Shafudah okwa holola kutya okushi shi kutya oilonga yoludi latya ngaho oina omashongo mahapu. Nande ongaho okwa indila ovanambelewa va yelule omupolo mombada ngeenge tava longo oilonga yavo nokukala vena etumba mwaasho tava ningi opo keelwe oinima inai pitikwa moshilongo.

Minista okwa indila ovanambelewa opo va longe onga ovamwainafana. 

“Okulongela kumwe ihaku yambula po ashike oidjemo yehangano leni ashike ohaku xwepopaleke yoo oyuuyemo yoshilongo nokukala muna eudafano nelinekelafano la kola moilonga,” Minista ta holola ngaho. 

Minista okwa holola kutya ouministeli inau dimbwa ovo vali va fyaala po eshi NamRA a totwa okudja mouministeli woimaliwa. 

Okwa ti ovo vali va fyaala po paife otava ka mona omhito opo va hoolole ngeenge ova hala okulongela NamRA ile otava kala mouministeli woshimaliwa. 

Ovanambelewa ovo tava tengenekwa veli 80 nonande veli koshi youministeli woshimaliwa, ohava longele NamRA pakafimbo. 

Omukulunhuwiliki waNamRA Sam Shivute okwa holola kutya ehangano lavo otali twikile okulonga nouyuuki nokukwashilipaleka kutya Namibia okwa mona ouwa mwaaishe oyo tai ya ile taidi moshilongo. 

“Onghene ohandi mu tu omukumo opo mu twikile okulonga noudiinini nokulonga nodjungu moilonga yeni muyakule oshiwana,” Shivute ta tu ovanailonga vaye omukumo. 

Omanga, Omukulunhu wokeengaba Abner David okwa holola kutya NamRA okuli metifa lokukandula po omashongo ovanangeshefa vashona unene ovo hava landifa oinima yavo momukalo wa shiivika nawa ‘order with me’. 

David okwa ti NamRA okwa teelelwa e uye po nomanyakulo komaupyakadi ovakwashiwana ava kexuulilo lodula ile petameko lomudo tauya. 

“Otwa kala oule wefimbo twa tula omakemo oshiwana notwa kala hatu li pula kutya ohatu kandula po omakemo avo ngahelipi. Otu shishi kutya omakemo amwe okuli modjila shili,” David ta holola. 

-wakudumoauleria@gmail.com