ONGWEDIVA – Olutu lwokulongekidha Ongwediva Annual Trade Fair (OATF) koshi yelelo lyondoolopa yaNgwediva, olwa gandja omapapa komahangano nokaantu oohandimwe mboka lya tala kutya oya dhana onkandangala muukalipo womauliko giipindi gokomumvo.
Elelo okwa li lya gandja omapapa kwaamboka ya dhana onkandangala momukokomoko okuza sho omauliko gopaipindi ga patulula omiyelo galyo tango omimvo omilongo mbali nasha dha ka pita.
Omauliko giipindi ngoka kwa li ga tameke oshiwike sha zi ko mEtitano oga hulu Olyomakaya, naayihe oya enda ngaashi ya li ya longekidhwa.
Omauliko giipindi mOngwediva oga tamekele konima yoomvula 23 ngashingeyi oga kala taga pula komeho omumvo kehe, kakele komimvo mbali ndhoka kwa li ga kalekwa omolwocorona mo2020.
Kehe omvula aalandithi naawiliki yiipindi ya yooloka oya kala nokuya yu ulike iilandithomwa nomayakulo gawo momauliko muka.
Mayola gwelelo lyondoolopa lyOngwediva Tarah Shalyefu ota ti, omauliko oga enda nawa lela.
Shalyefu okwa tumbula kutya omawuliko ngaka oga li ga nana aanangeshefa nomahangano ogendji ga zi meni nokondje yoshilongo.
“Aapindiki yoondondo dha yooloka moshigwana, mboka ya li ya kutha ompito momauliko giipindi oya li oyindji lela. Ayehe oya li ya nyanyukilwa ompito ndjika,” ta ti ngaaka. Aanangeshefa oya ulike omukumo osho wo ohokwe yooshiindingili shika okuza esiku sha patululwa.
Omauliko ngaka gonuumvo oga li ge egululwa pambelewa komupevipresidente gwoshilongo, Netumbo Nandi-Ndaitwah.
Nandi-Ndaitwah okwa li a kumagidha mboka haya longekidha omauliko giipindi ya kale haya longele kumwe nepangelo osho wo omahangano omanene okutseyithila nokuhiya aanangeshefa kondje yiilonga ya kuthe ombinga.
“Pamukalo ngoka otamu humitha eliko moshilongo osho wo miitopolwa nomoondoolopa dhawo. Iinyangadhalwa mbika oyasimana moshilongo, onkene oyina oku kala tayi xwaxwamekwa, oku kokeka eliko moshilongo,” ta ti ngaaka.
Ta gwedha po kutya okuna omukumo, nethano ota li ulike kutya oshilongo oshi li pokuzamo monkalo moka ya kala, sha ashike tashi tsikile okulonga nuundhinini.
Omupoliko gwelelo lyondoolopa lyOngwediva Ottilie Shingenge okwa ti nonando pokuma pwa gongala aantu oyendji ihapu kala pwaa na omaipumo mumwe, okwa tumbula kutya omauliko giipindi gaNgwediva nuumvo kaga li nando uupyakadhi wa sha.
Okwa gwedha po wo ta ti, oshigwana osha gandjele lela elongelokumwe lyasho.
Onkene elelo lyaNgwediva olya pandula aakwashigwana ayehe molwe yihumbato lyawo lyonawa.
“Ina tu tsakaneka nando uupyakadhi washa meni lyomauliko giipindi.
Aakwashigwana ayehe oyi ihumbata lela nawa.
Omauliko giipindi ngaka okwa tegelelwa ishewe ga tsikile omumvo tagu ya pethimbo lya faathana pendiki tuu ndyoka lyomaulikilo giipindi.