OHAKWEENYANGA – Omukondjelimanguluko gwomimvo 74, okwa hokolola kutya ngele taku hokololwa Salomon Jesus Hawala, oye ta popiwa oshoka kehe shoka sha ningwa ethimbo lyekondjelomanguluko moshilongo osho wo kombanda osha ningwa okupitila muye, oshoka okwa li omupopiliko oshowo omutumwa gwaHawala. 

Castro “Mbwangela” Nambwanga a tseyika nawa wOkomutuni esiku lyoshituthidhimbulutho shomukuluntu gwetanga lyegameno kwa li Hawala, okwa popi komeho gengathithi kutya ku uvite nawa oshoka okwa dhimbiwa, nonando oshindji tashi simanekitha Hawala omolwa ye. 

“Otandi tameke noonakulwa aakulu ya thikama tango kungame nena mpaka, inaya tumbula edhina lyandje, ashike oye shi shi nawa kutya ngele taku popiwa Hawala ongame ashike tandi popiwa, oyendji mu li muka otamu shi koleke,” ta nyenyeta ngaaka. 

Nembwanga okwa popi kutya okwa mona iihuna ethimbo lyiita kombanda nomeni lyoshilongo, ta kondjele oshilongo shika shi manguluke ihe sho sha manguluka okwa dhimbiwa. 

Sho kwa li kwa ningwa oshikunino sha li sha nuninwa okukuta oonakulwa aakulu mboka ya lemana tashi ithanwa Eunda, okwa li a mono ko iilonga hoka a li a tsakanene ko anuwa nOmuprima gwoshilingo ethimbo ndyoka Hage Geingob. 

Nambwanga anuwa okwa li a ihokolola kuGeingob esiku ndyoka, kutya oye lye naashoka a li ta longo kombanda sigo e mu dhimbulukwa. 

“Geingob okwa li a kuthandje po poshikunino mpoka kwa li tandi longo e ta fala ndje kegumbo lyayinamweno kwali komukunda Uukwangawa kUukolonkandhi hoka nda li nda kutwa ongomuniilonga gomegumbo, handi yakula aayenda ngele taye ya mo megumbo. Andi tudhithwa oondjuhwa nokuthula iingulu, omanga yakwetu ya ningwa ookomanda.” ta popi ngaaka. 

Ta ti, okwa mono iihuna, omanga yamwe mboka inaaya kondjela oshilongo shika ngaashi ye, ya pewa esimaneko niilonga yi na oombandi sho oshilongo sha manguluka, ye ta dhimbiwa. 

Nambwanga okwa ti sho a kala nokukondjitha a mone iilonga, nonando moshilongo eya mo momumvo 1989, anuwa okwa ka kutwa ongomupolisi momumvo 1997. 

“Miilonga onda kala mo ashike omimvo 14, ndi li ponkatu yaashi yiilonga nda kala te ongo nokukondjela oshilongo shika,” ta nyenyeta ngaaka. 

Ta ti, oshimaliwa shoka a mono shopenzela inashi gwana okugwanitha po oompumbwe dhe adhihe. 

Omanga ta popi ngaaka komeho, okwa li u ulike omukuluntu gwetanga lyegameno kwa li Martin Shali te mu tumbula kutya ota vulu okukoleka ayihe a popi mpoka. 

“Otandi dhimbulukwa kwa li nda tumwa kuShali ndi ka tale ko Aacuba ya li ya kondekelwa mekololo kaatondi, nonandi ya ete ye na omwenyo, ihe osho nda ningi, oye ngoka e li mpoka itandi mu lundile,” ta popi ye ta ulike Shali. 

Shali okwali a zimine omanga a kuutumba naashi a zi ko komeho, okwe mu tsakaneke nokumupapatela ye te mu pupula kombunda. 

Aakondjelimanguluko yamwe oya li ya tsakaneke Nambwanga sho ta zi komeho noku mu pa omake yo taye mu pupula kombunda, yamwe taya popi kutya okwa popya oshili. 

Shali sho a yi komeho a ka gandje oshipopiwa she okwa koleke kutya Nembwanga oku mu shi nawa okuza kombanda sigo omoshilongo. 

Ekondjelomanguluko 

Nambwanga ta ti okwa kala ha tumwa komahala ngoka ganika oshiponga, ha tumwa kookomanda oshoka oye ashike ali a inekelwa, onga omutumwa. 

“Sho nda galukile moshilongo okuza kombanda ondali nda pewa natango oshinakugwanithwa shokuuvitha ko omakakunya ga galukile koSwapo. Nda li ndi na ombelewa yandje hayi patuluka ashike uusiku omanga omutenya ya pata oshoka okwa li nda lombwelwa kutya inashi shuwika,” ta popi ngaaka. 

Nembwanga okwa ti, iilonga a longithwa kookomanda iinene, ta ti opo Hawala a simanekwe omolwa ye, onkene oku uvite kutya ina pewa omauwanawa agehe ga pewa aakondjelimanguluko ooyakwawo. 

Ta ti, sho a galukile moshilongo oonakulwa aakulu ooyakwawo oya li ya pewa iilonga, ihe ye okwa li anuwa a kala nokushunithwa ko pwaa na omatompelo. 

“Onda kala tandi lombwelwa kutya ondi shiwike nandi tegelele ashike, otandi ithanwa oshoka tse otse aakuluntu, ihe shoka inashi ningwa,” ta popi ngaaka. 

Nembwanga okwa yeleke ethimbo olyo tuu ndyoka kutya aapopi ya zi ko itaya popi oshili kutya sho kwa li kuna olugodhi olunene koKatima mulilo lwaantu ya adha 500, kutya kape na gumwe a li a gamene Hawala, ayehe oya li ya matuka po. 

“Oshoka ngame okwa li omugameni gwe kakwa li tandi vulu okuthiga po komanda gwandje, onda kala ashike ngame andike amuhe omwa matuka po, ngele ote fundju gumwe a li a kala po na thikame paife,” ta popi ngaaka. 

Nambwanga okwa ti, nonando a longele oshindji oshilongo shika okwa dhimbiwa nena ota mono iihuna. 

-vkaapanda@nepc.com.na