Taimi Haihambo 

EENHANA – Imwe yomeefikola di li moshitukulwa shaHangwena yedina Hifikepunye Pohamba, oya mona ekwafo loipakete yeeshi doHorse Mackerel i li 90, oushako voufila wepungu vo 20kg ve li 50 osho yo oupakete veeshi domeendooxa ve li 30, konima ya kala tai hepekwa kuNakaidi kaHalweenya. 

Omukunhufikola wopofikola Hifikepunye Pohamba Petrus Shikongo okwa ti okwa didilika ondjala oyo ya kala tai hepeke ounona ngeenge tava i kofikola. 

Onghalo vati oya ya elihongo lounona vahapu moshipala shaashi okaana vati ohaka dulu okukala ka dja keumbo inaka makela sha nghee ngaho ka lile nande ouvalelo. 

“Ovanafikola eshi tava i kofikola ohava kala ngeno va meta okatete oko hava telekelwa pofikola, ashike paemhito dihapu oufila nao ohau kala wa pwa po, nohashi kwata efimbo lile epangelo li ete oufila,” ta ti. 

Vati onghalo oye va fininika opo va ka konge omakwafo kErongo Marine melongelokumwe noSocioPartner Investment opo va dule okukwafa pamwe enongo taa fe ngaho ongobe. 

Shikongo okwa ti eshi va shangela ko, nande sha pula efimbo lile kashona opo va dule okukwafa, Erongo Marine opamwe noSocioPartner Investment ova twa omitwe kumwe opo va dule okuvatela apa tava dulu. 

Omahangono aa avali natango okwa twa eenyala kumwe osho yo omadilaadilo kumwe opo a kwafele eefikola da fika po19 moshitukulwa. Eefikola edi da kwafelwa oda dja koikandjohongo ngaashi Ondobe, Oshikunde, Epembe, Ongha, Okongo, Otunganga, Ohakafiya, nOhangwena.