Opolifi moshitukulwa shaShana oya patulula oshibofa omo omukainhu weedula 34 vati a kwatwa onghonga ndele ta dengwa nekatana komulumenhu kwali e na naye ekwatafano lopaihole. 

Oshiningwanima osha ningwa oshivike sha djako komukunda Ombaala moshitukulwa shaShana. 

Omukulunhu koshikondo shokukonakona oimbuluma mOshana omupedu komufala, Fredrick Ndjadila okwa hokolola ta ti omufekelwa okwa ya keumbo lomukainhu ou ndele te mu pula kutya omolwashike ine mu hala vali. 

Ota ku hokololwa kutya omufekelwa okwa nukila omukainhu ndele te mu denge nokonima vati okwe mu kwata onghonga. 

Oshiningwanima osha ningwa pefimbo nakuninga oshihakanwa a hangika ta teleke ouvalelo. 

Opolifi oya ti omufekelwa ohadi momukunda umwe nomukainhu ou ashike okwa li ve li nale mekwatafano lopaihole. Omufekelwa okwa faduka po nomakonakono opolifi otaa twikile. Opolifi oya kumaida ovalumenhu opo va xulife po okulongela ovakainhu ominyonena ngeenge tava xulifa po omakwatafano opaihole navo. Oshiningwanima shikwao, okakadona keedula 14 oka kwatwa onghonga kumushiinda shavo ndele ka pewa eteelelo. Oshiningwanima osha ningwa komukunda Ombuga ya Munyoko moshitukulwa shaShana. 

Ouyelele owe uya kombada eshi ina yokaana a mona kutya mboli okaana oke na eteelelo. 

Opolifi oya hokolola tai ti omufekelwa okwa ya keumbo ha kudi okaana ndele ta ka ningile omatilifo kutya ote ka dipaa nokukalongela omunyonena wopaixulo. 

Ota ku hokololwa kutya oshiningwanima osha ningwa pefimbo ina yokaana hangika a dja mo meumbo. Omufekelwa ina kwatwa po nomakonakono opolifi otaa twikile. fhamalwa@nepc.com.na