ETUNDA – Mueteleli wanaha Netumbo Nandi-Ndaitwah nafelize poto ya hae ya kupotela masimu amubuso mutulo wanaha kwa Etunda Lamubulo, amano potela Kavango ni Zambezi.

Kwa Etunda, naizo potela simu ya lihekele zelishumi kazeketalizoho ya veine, kokuna ni babeleki ba myanda yemilalu, mi ayo ikopanya ni balimi ba kwateni hala butata bo batalimana ni bona. 

Kakukolwisa balimi naize mubuso uitamile kutatulula butata bwa mwalitaba za njimo nikufelisa tala. “Mubuso usiala uitukiselize kubeleka ni bayahi kaufela banaha Namibia kutusa batu kaufela,” nekuhatelezi Nandi-Ndaitwah.

Zeo halili cwalo, muzamaisi wa simu Sacky Shilyomunhu natalusize kuli Etunda ina ni masimunyana ni masimu amatunanyana. Simu ina ni mubu olikana liemba zemashumi amalalu oitukiselizwe kukalimiswa, kakuba kalulo ya mubuso ya kuyandulula ni kuzwisezapata litaba za njimo. 

“Mubu omunyinyani una ni liemba ze 97 ili olikana lihekele zepeli siemba ni siemba, ili kulikana lihekele ze 291 haukopana, mi balimi ba 67 bapatehile kanako yacwale,” natolokile.

Shilyomunhu, kono natalusize kuli simu italimana ni butata, kungelela cwalo ni businyi bwa zeyahilwe ki limembala za sicaba. Napatuluzi hape kuli Etunda italimana ni lisinyehelo za kweli zelikana N$700 000 ili kutahisa kuli kusike kwa ba ni kekezo. 

Mubusisi wa sikiliti sa Omusati Immanuel Shikongo naize poto ya Mueteleli wanaha neli ya butokwa ni konkisezo ya butokwa mwa kucafanza njimo, kubateni kwa lico ni kuhula kwa sifumu.

– vkaapanda@nepc.com.na