UUKUVU – Ofamili yokamatyona keedula nhano oko vati ka dipaa okaana kokakadona keedula mbali oya hokolola tai ti kamatyona okwa kala e na omadidiliko onyati molwaashi okwa kala shito ha denge ounona vakwao, okuvaka nokuxwika eenduda domeumbo. 

Etitano loshivike sha dja ko opolifi koshitukulwa shaMusati oya koleka efyo lokaana Namupa Lisias a dengwa nomamanya fiyo omefyo kokamatyona haka di poushiinda wavo. 

Oshiningwanima osha ningwa efimbo lomutenya eshi ovadali ve li keendingosho. 

Okaana keedula 10 oko ka lombwela ovadali keendingosho kutya Namupa okwa dipawa kumukwao. Ovadali eshi va fika meumbo ova hanga okaana ka xulifa taka di ohonde momayulu. 

Ina yokaana oko ka dipawa omukwashiwana Omuangola noku li omunailonga meumbo olo la shaama ashike neumbo omo hamu di okamatyona ou vati a dipaa mukwao. 

Pefimbo Kundana a talela po keumbo oko kwa ningilwa oshiningwanima, inakulu yokamatyona Anguste Amutenya okwa hokolola ta ti konima yeemwedi nhatu natango kamatyona okwa li a lumata Namupa keenyala. “Namupa okwa li a dinda unene. Okwa li a twalwa koshipangelo,” ta ti. 

Amutenya okwa hokolola ta ti okamatyona kake hole Namupa shaashi okwa kala alushe he mu denge neengoyo. 

“Omutekulu wange oha vake ombelela mombiya, okwa xwika po eenduda mbali meumbo mwa kwatelwa oikumbafa,” inakulu ta hokolola. Okwa koleka ta ti inava ninga onghendabala yokutwala okamatyona koshipangelo opo ka ningilwe omakonakono opaunamiti. Sarafina Mateus ou e li ina yaNamupa okwa hokolola ta ti okuhole okuya nokaana kaye keendingosho shaashi kape na ou ha kala nako meumbo. 

“Efiku olo onda ya keendingosho nokaana kange ndele handi ka landele oukuki. Konima yefimbo umwe womushiinda shange okwa ya naNamupa keumbo lavo ndele te mu fiye ko fiyo ta dipawa,” ta ti. 

Mateus okwa ti okwa li ve shi ngeenge omashendjo eshi va lombwelwa kutya Namupa okwa xulifa. “Eshi twa ya keumbo otwa hanga okakadona oko keedula 10 ka helula omudimba ta ke tu ulikile kutya Namupa osho shi li okwa xulifa,” ta ti. 

Okwa hokolola ta ti kamatyona ye okwa hangika e kwete okapalwa nelalakano lokuxwika po omudimba. 

“Ngeno Namutenya ina twala okaana kange keumbo ngeno osho inaka dipawa. Kandi shi kutya elalakano lokufiya Namupa keumbo ola shike kwa li,” ta ti. 

Mateus okwa ti paife okwa fiwa po nounona vane. 

Hilia Shilau ou a kufa Namupa keendingosho ndele te mu fiye keumbo lavo okwa ti elalakano okwa ya naye keumbo shaashi okaana okwa li ka fya ondjala. 

“Efikuolootwapitilaongulakeendingosho. Okwa li ndi wete kutya osh apuka eshi Namupa e li meendingosho a fya ondjala,” ta ti. Okwa ti oshoshili okwa fiya Namupa keumbo lavo nounona vakwao osho sha eta opo mboli a ka dipawe. 

Secilia Ndakondje ou e li ina yokamatyona oko ka dipaa, okwa yelifa ta ti okwa kala alushe ha pukulula okaana kaye ngeenge ta ka denge vakwao ashike ihaka lombwelwa. 

“Naame onda nyengwa kutya okaana kange openi ka hanga eemhepo da kaka. Mepapa letu kamu na omunhu e na onyati ya fa yokaana kange,” ta ti. 

-fhamalwa@nepc.com.na