Auleria Wakudumo 

Epangelo laUnited Kingdom (UK) okupitila mombelewa yomukaleliposhilongo waalo moNamibia nomelongelokumwe noprograma yoikulya yoiwana yahangana hano oUnited Nations World Food Programme (WFP) otali deula eefikola osho yo ovanafaalama vanini ounamapya moshikandjohololo shOnayena moshitukulwa shaShikoto. 

Ombelewa ya-UK osho yo ovanambelewa okudja moprograma yoikulya yoiwana yahangana oya talela po ofikola yaMateus Nashandi okutala nghene tayi file oshisho oshikunino shavo osho sha totwa po molwekwafo la-UK. Oshikunino eshi osha totwa mo2023. Osha totwa nelalakano okulonga oikulya yovahongwa pofikola osho yo okukwafela okuweda ko koikulya oyo ovahongwa hava mono nale okudja kepangelo ngaashi okatete. 

Oproyeka ei otai hongo yo ovahongwa ounafaalama, nghene ve na okulonga oikulya yefiku keshe ngaashi ombidi yokongolo, omakeembidji, ounakanamudesha naikwao ihapu. 

Epangelo la-UK ola twikila yo oproyeka ei movakalimo vomoshikandjohololo shaNayena. 

UK okwa kwafela ovakalimo 28 vomIikokola mounamapya. Ovakalimo ava ova ninga paife ovafaalama vanini molwepangelo laUK. Ova pewa yo oikwafifohongo yoikunino yavo ngaashi Ounete vomudile voikunomwa, omiti dokudipaya oupuka koimeno, oshoyo oilongifo ngaashi ouhalaka, omatemo, eembike naikwao ya wedwa po. Omukulunhu woprograma yoikulya yoiwana yahangana hano oUnited Nations World Food (WFP) moNamibia Naouar Labidi okwa holola kutya osha fimana okulongela kumwe okukwashilipaleka kutya omhumbwe yoikulya oya kandulwa po. “Okulongela kumwe nombelewa yomukalelipo wa-UK moNamibia otashi tu kwafa okukwafela oshiwana nomonakudiwa nokulundulula eenghalamwenyo davo defiku keshe,” Labidi ta ti ngaho. 

Omukalelipo wa -UK moNamibia Neil Bradley okwa kwashilipaleka kutya UK ota twikile okukwafa Ovanamibia unene ovo ve li koushai keembinga neembinga. 

“Mokuyandja owino nekwafo loikwafifohongo, ohatu kwashilipaleke kutya ovakwashiwana otava ka longa oikulya ihapu okupalula ovakwanedimo vavo nokumona mo oyuuyemo,” Bradley ta ti. 

Kansela woshikandjohololo shaNayena Kamati Nelumbu kwa holola olupandu kepangelo la-UK osho yo oiwana yahangana. 

Okwa ti oproyeka ei otai eta elunduluko momudingonoko wavo. 

-wakudumoauleria@gmail.com