Auleria Wakudumo
Minista wehongo, oungoba nomaudano Sanet Steenkamp okwa holola kutya oidjemo yomakonaakono ali a ningwa okuholola oshietifi shoudiyo oo wali tau fekelwa moikulya yovahongwa kosekundefikola yaMaria Mwengere moshitukulwa shaKavango East oya holola kutya omeva a kaka oo a eta oudio moikulya yovahongwa.
Minista okwa kwashilipaleka kutya oikulya hayo yali ina oudio ndele ondoloma yomeva a kaka oo a longifwa okuteleka oikulya oo a eta oudio moikulya.
“Omakonaakono okwa holola kutya omeva oo a longifwa okudja mondama okuna okaloline keli pombada neemiligrama 2.2 molita keshe. Okaloline keli pombada ngaho inaka wapa okulongifwa kovanhu unene okunwa ile okulongifwa moikulya,” Minista ta holola ngaho.
Steenkamp okwa twikila ta ti ouministeli owa ninga etokolo okuningila keshe osho sha longifwa okutelekifa oikulya omapekaapeko eshi va shiiva kutya oonakuningwa oihakanwa vamwe inava lya oikulya oyo, ashike ova kwa twa koudio.
Minista okwa holola yo kutya omeva okwa holoka a lunduluka oluvala, taa ulike kutya okuna eembakiteli nokwa kaka.
Steenkamp okwa ti kutya onghalo yovahongwa oya naipala eshi va twikila okulongifa omeva oo shaashi ka pali pena ou eshii ngeenge okuna oudio washa.
“Ouministeli otau ka kwashilipaleka kutya owa kandula po omukundu ou pakafimbo omanga tau ningi yo omangela tai kalelele. Ohatu ka tula ka kwashilipaleka kutya otwa longulula nokukwatela po okila yokutalaleka oikulya pofikola,” Minista ta ti.
Minista okwa holola yo kutya otava ka tula po otenga yomeva ipe momuhandjo oshoyo omandoloma eelitela o10 000 avali pombada. Ouministe otau ka kwashilipaleka yo kutya omuhandjo owa landula omulandu wokuteleka womomihandjo depangelo notau ka teleka ashike oikulya oyo ya ufwa kouministeli.
Omilandu dimwe dovateleki vomomihandjo depangelo omwa kwatelwa okundjala odalaxa yokuteleka yeli xwapo.
Ouministeli owa holola yo kutya otau ka eta po omilandu doundjolowele oo tau ka landulwa keefikola adishe odo dina omihandjo oshoyo omangela moshitukulwa keshe tai holola nghene tava ka tula moilonga omilandu odo nokukwashilipaleka kutya oda tulwa moilonga kofikola keshe.
Otaku hokololwa ovahongwa va hanga po33 vali va tambulilwa moshipangelo shepangelo shaRundu, sha landula eshi va lya oikulya ya telekwa mekulo omwedi wa dja ko.
-wakudumoauleria@gmail.com