ǀAEǁGAMS – Covid-19 xa !aromahe hâse ra sîsenǀû kaihe khoen di ǂharo ra !gôab !hūb a ǂhawaseb ge hâ a ǁgoaǂuidi di ǀguis ǀguisa i. 

Nausab, nē mâsiba Namibiaba ra ǁgari !hūsâuǁkhāsiba ǁkhawa omkhâis !aromase. 

Nēsab ge !hūǁî sîsengu ǂansabeb Herbert Jauchi !khâikhom tsî ra mîsa ǂgui sîsengu hîa go Covid-19 xa !aromahe hâse a ǂoa!nâhegu ǁkhawa oahā tidesa. 

!Auga!hūsi ǂansaben tsîn ge ǁkhā !khâikhomsa mā tsî ra mî, ǁaupexa 50%gu khoen ǀguin ǁnān hîa ge hoa !hūbaisise sîsenǀû kaihen xan ǀnîsi ǁkhawa ǁîn sîsenga a hō-oa ǁkhāsa. Ministeris sîsengu dis di !gôakhâigu ge ra ǁgau, Namibiab !nân ge nē kurib !Hoaǂkhaiba xu Gamaǀaeb kōse 5 700 xa a !nāsa khoena ǁaupexa 390 sîsemā-aon xa a sîsenǀû kaihesa. 

Nē sîsenaona xun ge 1 816 Covid-19 xa !aromahe hâ tsî nau 3 900 xa a !nāsa !gôaba ǀnî hâ !aroman !aroma. 

Sîsengu Ministeris !nurigu ge ra ǁgau, ǀKhomas ǀkharib hoan xa a ǀgapi !gôab 2 838 diba ūhâ, Erongob xa 1 309 ǀkha saohe hâse, ǁnāpa kha Omahekeb tsî Omusatib hâkha ǁîb a ǂam !gôab !nona tsî koro khoen diba ūhâse.”Hoa ǀkharigu !nâb ge Kavango Huriǂoas ǀkharib ǀguiba ǁkhā ǁaeb !nâ ǀguis khami i sîsenǀû kai-e !nuri tama hâ. 

Hāǀaro rase ra !nurihes ge 405 ǂhanuo!nâ !haedi ge hâsa, ǁîde xu di 13de Covid-19 ǀkha !gaeǁaresa ūhâse. 

Covid-19 ǁaeb !nâs ge nē ministeris tsîna 588 ǁhōna dītoas ǀkha ge khaohâ,” tib ge ministeris !nuriba ra mî. 

New Erab ǀkhab ge ūhâ i dî!nâǁgamǁare-i !nâb ge Jaucha ge mî, 60%gu Namibiaǁîn hîa aitsama ǂnaumaisa ǁanǁguigu !nâ ra ǂharugubasenn di sîsen ǂoa!nâdi nē !nurib !nâ a ǀkhaisa. 

Jauchi ra mîsa !oan ge ǀnî ǂharugun aiǁgause ǁkhanadi, !nari!oabadi tsî ǂnamipeb tsî !narisarima-aon dina tātsē ǀnain ge mâ ipa sī tidesa. 

Ministeris ge !aruǀî ge mî ǁîs ge !Hoaǂkhaib tsî Gamaǀaeb ǀunis kōse 2 000 xa a !nāsa sîsenôa-aona a xoamâisa. Ministeris xoakhâib ge ra ǁgau 25 xu 29 kurin kōse hâ !âb ǀgapi !gôab (572) sîsenôa-aona ūhâsa, ǁnāpa xu 30-34 kurixan xa (453) tsî ǀunis ai 35-39 kurixana (305). 

ǁNaetisases ra dīses ge ministerisa !kharaga sîsen!khaigu tawa 503 !kharaga ôa!nâde !Hoaǂkhaiba xu Gamaǀaeb ǀams kōse gere dī, ǁîde xu di 112 ôa!nâde ǁnaetisase ra dīhedi !âse tsî !gau ra 391 di ge Covid-19 ǀkha !gaeǁaresa ūhâ ôa!nâ ge ide. 

Nē ôa!nâdi !nân ge ǀhaob ai 9 908 sîsenaona gere ǁhao.