Taimi Haihambo 

Epangelo ola dimbuluka ovakalimo komukunda Oshikunde, moshitukulwa shaHangwena, eshi la ninga onghendabala yokutunga eepate deengalama pomudingonoko. 

Ovakalimo vomomukunda Omukukutu nOmboloka ova ninga ovanelao mokumona opate lwotete pomidingonoko davo. 

Okudja ashike konima yekondjelomanguluko, ovakalimo ova kala ashike have lidenge efululu lakatyaka eli hali tongwa. Ovanelao ovava va kala ve na eendongi, shaashi odo hadi dulu okulyata efululu noupu, nokuendelela unene ngeenge pe na omunhu a ombokelwa ile a pumbwa ekwafo lomeendelelo. 

Omupopiliko welelo loshitukulwa shaHangwena Silas Nepembe okwa ti ei oyo opoloyeka yomwaadimwe ve lipyakidila nayo moshitukulwa. 

“Eshi otashi ulike nghene epangelo tali kendabala okutula oshiwana komesho osho yo okuwanifa po dimwe domeemhumbwe odo da kala da pumbiwa kovakwashiwana efimbo lile,” Nepembe ta ti. 

Nepembe okwa twikila kutya epangelo vati ola yandja N$53 394 373, opo li dule okutungila ovakwashiwana vokomikunda eepate edi. 

Ehangano eli le linekelelwa okutunga opate ei olo Eponga Trading CC. Eponga Trading ola longa ko nale eepelesenda 63 nokwa fyaala ashike eepelesenda 37 opo i kale ya pwa, i nangekwe pambelewa yo i tameke okulongifwa kovakwashiwana. 

“Opate ei oya tamekwa okulongwa momafiku 02 Juli 2024. Opate otai tengenekwa i kale ya pwa okutungwa mo03 Januali 2026,” Nepembe ta holola. 

Immanuel Heelu omukalimo wokoshikandjohoololo shaShikunde okwa ti vo otava kulaukile kopate yavo va hala ipwe. 

“Oshili otwa kala hatu longo noudjuu ngeeenge tashi ya kokuya kodoolopa. Eetuwa edi hadi fiki ko odishona neenghono, nongeenge owa shaala po opuwo,” ta ti. 

-taimihaihambo200@gmail.com