ONGWEDIVA – Muuna walilimo zemashumi amane, yana ipitisa kuli ki mubuleli, natamilwe kasamulaho akuputelela mahe mukwena’hae, ili yakula butuku bwa kensa, kaku mupuma kuli uka mufolisa. Zeo neli ezahezi mwahala 26 ni 27 Muimunene kwa munzi wa Onheleiwa mwasikiliti sa Oshana. 

Yakulubelwa natamilwe Lamubulo kwa sibaka sa hae mwa komponi ya Okandjengedi, mwa Oshakati.  Mubakweli muzamaisi wa sipokola mwa sikiliti sa Oshana Fredrick Ndjadila nanitifalize kutamiwa kwahae. Mapokola babulela kuli yakulubelwa nakashelizwe kuyana putelezwi ki nyazi ya hae.

Kanako ya kutamiwa, mapokola nebafumani libyana zekulubelwa kuli kizabusholi mwa muzuzu omuñwi. Yakulubelwa napalezwi kutoloka hande kuli libyana zeo nalifumani cwañi. Kulu iliñwi yepila, macwe amansu amane amasola, kompiuta iliñwi ya mufuta wa HP, chaja iliñwi ya sola, sola iveta iliñwi ni mukotana ulimuñwi omunsu.

Libyana kaufela zene fumanwi linuhiwa kuli likona kuleka masheleñi akuma fa N$22 600. Kulu netambekilwe kwa babeleki ba likolo la Silalanda, Mishitu ni Bupoti. Kukulubelwa kuli yanyaziwa fokuñwi na ipitisanga kuli kimubuleli mi fokuñwi kiñaka, kono hakuna keleke ya kena yene fumanwi. Yomuñwi wa baikulu ba yana putelezwi nabulelezi New Era kuli kukwahae ukula butuku bwa kensa, mi mane nazusizwe lizwele.

“Mwana kezala bome, ili yana ni mwana ni yakulubelwa, kiyena wakumumema kuli ato lapelela bokuku,” nabulezi. Atalusa kuli yakulubelwa ni mwana kezela mahe nebatile kwandu yabona kuto bapotela, bazamaya ni baana babane, kungelela cwalo ni mukwaezi. “Neli manzibuana. Alaela kuli kukwaluna azwe mwamuzuzu mwalobala, mi akala kuyepa musima mwahali. Mane bazwiseza ni mumbeta fande,” nabulezi.

Yanyaziwa ukulubelwa kuli nabulelezi musalimuhulu kuli nekutokwahala kuli lipuli zepeli libulaiwe, kuli mali azona abeiwe mwa muzuzu wahae kuli ibe tatu ya “kuleleka madimona.” Sapili musalimuhulu naize hana lipuli kono yakulubelwa sapihelela kufitela alumela. “Neba bulaile lipuli mi baana bane bataha ni yena batusa. Batisa lipuli zebulailwe mwa muzuzu mi balizwisa litoho,” nekubulezi muikulu.

Yakulubelwa kiha sela mali mwamusima wana yepile, kamaikuto akuli mwa muzuzu nekuna ni madimona. Busihu bo, musalimuhulu afa mukwaezi N$200 yakuyo nwisa mafula. Sikwata kihasikutela kwa Oshakati nikushimba lipuli zepeli zene babulaile. Lizazi lelitatama bayokuta hape bashimbile lingumbuli zepeli zamezi, zene batilo lula mwamuzuzu kuba tatu. Mapokola babulela kuli yakulubelwa naize kulu naifumani mwatasa mumbeta wa musalimuhulu

Kono hakuna bupaki sakata mi kulumelwa kuli yanyazwa mwendi natile ni yona nikupuma kuli naifumani mwandu. Mubuleli kihakala kulaela kuli afiwe lika zeñwi kungelela cwalo ni lipula zemashumi amane, tusipi totu eza mashumi amabeli twa keleke yahae ni  N$3 000. Taba yeo ya bilaeza balubasi mi kihabaya kwa mapokola. Musalimuhulu kanako ye umwasipatela bakeñisa sabo.

 Mapokola babulela kuli nombolo ya babuleli ni liñaka za buhata inze i ekezeha. Kacwalo basususelize sicaba kubiha likezo ze cwalo.