OSHAKATI – Opolifi moshitukulwa shaShana otai konakona oshibofa shomulumenhu weedula 30 a kwatwa po shaashi vati a kwata okaana kaye keedula 11 onghonga.
Oshiningwanima osha ningwa oshivike sha dja ko kolukanda Omahenene mOshakati efimbo lomutenya.
Omukulunhu koshikondo shokukonakona oimbuluma mopolifi moshitukulwa shaShana omupedukomufala Fredrick Ndjadila okwa koleka oshiningwanima eshi.
Opolifi oya hokolola tai ti pefimbo oshiningwanima sha ningwa ina yokaana okwa hangika a ka landifa oukuki nokapana.
Otaku hokololwa kutya omulumenhu ou okwa kufa okaana monduda yokunangala ndele te ka longelo omunyonena wopaixulo.
Vati okwa lombwela okaana kutya ine shi popya komukainhu waye.
Omufekelwa oha di meumbo limwe nokaana ashike inava hombola nomukainhu waye.
Opolifi oya hokolola tai ti okaana oka dalwa komukainhu womulumenhu ou e li omufekelwa ashike aye xe.
Ina yomufekelwa eshi a lukila keumbo okwa didilika kutya okaana oka kwatwa onghonga ndele te ka ningile omapulapulo.
Pefimbo okaana ka ningilwe omapulapulo oka lombwela opolifi kutya ngaho oka kwatwa onghonga lwoshikando oshitivali.
Nakuninga oshihakanwa okwa twalwa koshipangelo opo aka ningilwe omakonakono opaunamiti.
Okwa anyenwa omhito yokuli futuila mo modolongo pefimbo a holoka momhangu yamengestalata waShakati oshivike sha dja ko. Oshibofa shaye osha undulilwa komafiku 16 Januali 2026 nelalakano lokuninga omakonakono.
Ovadali ova kumaidwa opo va tonatele ounona nelitulemo shaashi paife ounona ova ninga oihakanwa yokukwatwa onghonga kovapambele wavo.