Auleria Wakudumo
ONGWEDIVA – Omhangulilo yaMangestalata mOshakati oya yandja epitikilo kuNdeyanale Iithete weedula 32 opo e lifutile mo modolongo, omolwoshibofa shoulunga nekengelelo lokulongifa oufemba uhe shi waye.
Ndeyanale ota tamanekelwa oulunga nekengelelo lokulongifa oufemba uhe shi waye eshi vati a li ta kendabala okulongifa opo a dule okumona omukuli woN$20 000 koExpress Credit monhele yomangeshefelo hai ufanwa Oshana Mall mOngwediva.
Omukulunhu wopolifi koshikondo shokukonakona oimbuluma moshitukulwa shaShana, Deputy Commissioner Fredrick Ndjadila okwa holola kutya omutamanekwa okwa ya koExpress Credit ta pula eindilo lomukuli woN$20 000.
Opolifi oya ti Iithete okwa yandja okamutwe koshilongo kehe fi kaye nokwa yandja yo ombapila youmbangi womapungulilo ihe shi yoshili.
Express Credit okwa kwatafana nombaanga oyo ya holola kutya ombaapila yomapungulilo kai fi yoshili.
Ovanailonga vaExpress ova kwatafana nopolifi meendelelo mokudidilika oulunga ou, nopolifi oya holoka meendelelo okutula omufekelwa moipandeko.
Eshi a holoka komesho yaMangestalata mOmaandaxa, Iithete okwa pewa e lifutile mo modolongo noN$1 000.
Oshibofa shaye osha undulilwa komafiku 27 Apilili modula tai ya opo ku ningwe omakonakono omoule. Ka li a pewa omhito yokutya sha.
Nonande a pewa omhito yokulifutila mo, Iithete okul i natango konima yekumba moshitaasi shopolifi mOngwediva molwaashi ke na oshimaliwa shokulifutila mo.
Omukulunhu wopolifi moshitukulwa shaShana, Commissioner Naftal Lungameni Sakaria okwa holola kutya oulunga nekengelelo ola duva moshilongo, novakengeleli otava kendabala omikalo da yooloka opo va kengelele ovanhu.
“Vamwe otava longifa oufemba wovanhu okushangifa oukala vomakwatafano omanga vamwe ngaashi pamhito ei tava longifa oufemba okumona omikuli,” Sakaria ta ti.
Sakaria okwa kunghilila opo va ha yandje omauyelele avo opaumwene ile okuyandja omaufemba avo kukeshe umwe.
Omukulunhu wopolifi okwa kunghilila yo oshiwana opo shiha kengelelwe momukalo wokulanda eetuwa komalungula unene koFacebook, ile okulanda oinima ya ‘order with me’.
Sakaria okwa yelifa kutya opolifi ihai dulu okukwata po omunhu oo a pewa oshimaliwa ngeenge opwa li ekwatafano neudafano pokati keni.
“Oto dulu okupatulula oshibofa, ashike ohashi tuminwa komweeti woihokolola oo ha ka ninga etokolo la xuuninwa,” Sakaria ta fatulula.
Okwa ti eshi osha faafana nokuyandja eengunga komunhu.