Taimi Haihambo 

Opolifi moshitukulwa shaShana oya lopota onduba yoilwifo ya hangika yafudikwa mEvululuko mOshakati. Oilwifo vati oya monika konima eshi ovanailonga velelodoolopa laShakati, va hangika tava mete onhele i li molukunda Evululuko.Omupedukomufala wopolifi moshitukulwa shaShana Fredrick Ndjadila okwa ti umwe womovanashilonga eshi a ka fa opaala imwe,  okwe litwa moilwifo tai dulu okweeta oshiponga osho yo omakipa. A fudikwa, nokudja opo ova shivifila opolifi.

Ovanambelewa vopolifi ova ninga onghendabala opo va ka talelepo onhele meendelelo, nova hanga po oifufuta  iheyali ya ninga olusu. Ponhele opo natango vati opa hangika omakipa a kulupa oo vati ehe shiivike ngeenge oovanhu ile oinamwenyo. “Omakipa okwa kufwa opo a ka konakonwe, shaashi katu shingeenge ovanhu vopefimbo loita ile oinamwenyo,” Ndjadila ta ti.

Omupopiliko wopolifi moshitukulwa shaShana chief inspector Thomas Aiyambo okwa ti, eshi osho oshikando shotete modula omu tava mono olopota yoshingwanima sholudi eli.

Opolifi oya kunghilila oshiwana shi twikile nokushikula omukalo wa “ino shi kwata shi lopota”, nongeenge vati omunhu owe litu oinima ya nyika eendjebo ile oitopifa ya holekwa koshi yedu ile oilwifo, ino ikwata, ndele denga ongodi yopolifi meendelelelo.

-taimihaihambo2000@gmail.com