Auleria Wakudumo
Okakomitiye komutumba wopashiwana oko haka ungaunga noikwameni neameno noikwaveta moshilongo oka indila ouministeli woikwameni neameno lokeengaba novakufimbinga va wedwa po opo va tunge eedolongo dipe.
Okakomitiye aka oka ti ouministeli owa pumbwa okutunga eenhele dokwiidilila ovateyi voveta yoshilongo molwaashi eenhele dihapu odi li monghalo itai lididimikilwa noda pumbwa okutungululwa.
Okwa holola kutya onghalo mokalimosho kayi li pondodo opo ya pumbwa okukala.
“Eedolongo dihapu oda idilila omwaalu wovanadolongo wa pitilila. Ovanadolongo ove li mo va finana, omwaalu ou taku hokololwa wa pitilila omwaalu wovanadolongo oo wa tulwa po pamilandu dopaunyuni,” tava holola ngaho.
Okakomisi oka li ka ninga omakonakono kombinga yonghalo noukalinawa wovanhu meedolongo adishe moshilongo. Eedolongo da ningilwa omapekapeko omwa kwatelwa: Windhoek, Hardap, Keetmanshoop, Gobabis, Swakopmund, Walvis Bay, Omaruru, Grootfontein, Divundu, Evalistus Shikongo, Elizabeth Nepemba osho yo Oluno.
Okakomisi oka holola kutya eedolongo dimwe onghene da tungilwe mo1992, ina di vandekwa vali omunhoko fiyo okeluwa eli.
okomitiye oya twikila kutya eedolongo dimwe kadi na oundjuwo, tava ti ovanadolongo ohava longifa omavela oo a ningwa oundjuwo wavo.
Meedolongo omo mu na oundjuwo, vati oundjuwo ove li meenduda dokunangala osho sha talika ko sha nyika oshiponga koundjolowele wovanadolongo.
Otaku hokololwa meedolongo dimwe vati mu na oupomba womeva ashike itava longo.
Kombinga youhaku wovanadolongo- okuya koshipangelo, okakomitiye oka holola kutya nonande peenhele dihapu ope na oupangelo vanini, oupangelo ihava kala ve na omiti da wana naluhapu ohava ka konga omiti koipangelo yakula kondje yodolongo.
Okakomitiye oka holola yo kutya eedolongo dimwe kadi na eendokotola novapangi va wana. Eedolongo ngaashi: Windhoek noWalvis bay otaku hokololwa mu na ashike eendokotola oowumwe osho yo ovapangi oowumwe.