Mubihi wa Mutende

WINDOKO – Likalibe zesupile lipatalalize pisinisi ya kuluha, katuso ya katengo ka DREAMs, ili kaka sulelwa masheleñi ki naha ya US. Kutisa cwale lipisinisinyana zesupile neli tambekile mamasiki akwalifateho amyanda yemilalu kwa kampani ya Purojekiti ya Sepo, kuli asebeliswe mwasilalanda sa Windoko. Basizana ni likalibe baba fumaneha mwa katengo ka DREAMS, babanga ni mikopano kuambola litaba zebakataza. Ndumeleti wa naha US mwanaha Namibia Lisa Johnson, nafitisize manzwi akulumba likalibe zeitengile mwa lipisinisinyana, kanako yakutambeka mamasiki kwa liofesi za kampani ya Purojekiti ya Sepo ya Namibia mwa Katutura.

Naize, “taba ya DREAMS ilatelela mukwa oipitezi, bakeñisa kutalima litaba za maikuto, mubili ni makete amasheleñi. Taba yeo ibonahezi patalaza kanako ya kakokwani ka Korona, mi nataba kubona kuli semuba basali balipisinisi baba zwezipili mwakuluha mamasiki.” Kasamulaho akufiwa lituto ki katengo ka DREAMS, likalibe zesupile nelifilwe minshini ya kuluhisa hamoho cwalo ni lisebeliso zetokwahala mwakuluha, ki liluko la kufundota ni kuhulisa lipisinisinyana. Muñwi ni muñwi hala balipisinisinyana basupile uluha mamasiki abalwa kazazi, ili alekiswa N$20 kuisa mwa N$25. Kanako yacwale likalibe lisebelisa sibaka sa swalelele kupeta musebezi.

DREAMS iyemela litaka ze kunsufalizwe ili zetoloka kuli katengo ka ciseho, kaka tukufalezwi, kaka tiselizwe, kaka lwanisa katowati ka AIDS, kaka lutilwe ni kakana ni pukelezo, mi kafiwa masheleñi ki naha ya US. Katengo kana ni litaba zeñata zekatalima, hala kulwanisa kuambalakana kwa kakokwani ka HIV mwahala basizana ni likalibe. Mapurojekiti amañwi ki acwale ka lituto kuamana ni kuitaleha, silelezo ya HIV ni bubangoki, lituto za masheleñi hamoho cwalo nikuzwelapili mwakuipilisa. Purojeki ya DREAMS kanako ya cwale ifumaneha mwalikiliti zecwale ka Khomas, Oshikoto ni Zambezi, ili mokuna ni limembala zelikana 12 000, mi cwanuñu ituha iyandulelwa mwalikiliti za Oshana ni Kavango ya Upa.