Taimi Haihambo
Emiljo Sofia omukalimo wokOngenga moshitukulwa shaHangwena okwa ti ye nande e na ngaho oilonga yaye yokomwedi, okwa kwatwa kediladilo lokueta po oshimaliwa shopomunghulo omo a tameka ounafaalama weeshi pomukunda wavo.
Okwa yelifa kutya eshi she mu fininika opo a tameke ongeshefa yaye, okwa hala okuyambula po omukalo wokweeta oikulya poshitaafula kuye mwene, nokovanhu vopomukunda wavo, ye natango a yandje eemhito dokulinyangela kovakalimo vopomukunda wavo.
Vati tete kasha li shipu okweeta po ediladilo loludi olo, momukunda ashike ngahenya nokuli.
“Kanda li lela ndi na oikwafifohongo aishe nda pumbwa pefimbo opo. Osha pulan nge konyala oule wodula aishe 2023 fiyo omokati ko2024, opo ndi kale nda eta po aishe oyo kwa li nda pumbwa ndi tameke ounafaalama wange,” ta ti
Okwa twikila kutya eshi a mana okutunga ondama yeeshi, nokutula mo omeva, okwa ka ninga po vali oule wefimbo opo ouministeli wounamapya u dule okweeta ostoka yaye youdiyodiyo ava hava shituka eeshi opo a dule okuya komesho.
Okwa ti konima eshi aishe ya wana po, okwe ke lipaka mo lela moilonga yaye fiyo eeshi tadi kulu do tadi dala. “Eshi eeshi da kula, osha pa nge ediladilo ndi tameke eteyo lange lotete. Eteyo ola endele nawa, nola li la etela nge eekastoma lela,” ta ti.
Vati okwa li a mona vahapu ve ya okulanda eeshi, vo va dule oku ke di landifa natango.
Okwa twikila kutya nonande va li ve na eteyo lela li etifa eenghono, ohava kala yo nokutaalela omashongo ahapu ngaashi omhumbwe yoikulya yeeshi.
“Oikulya ei hatu pe eeshi ohatu i mbestele kouministeli ashike efimbo lihapu ihapu kala pe na ostoka. Onghalo oya fininika nge ndi kale handi teleke oifima yonghundu ame handi i kukutike doo tadi li. Natango ohandi di pe yo omaadi ngeenge ovanhu va yenga,” ta yelifa.
Oudjuu ukwao natango vati onghalo yomhepo yomOwambo ei ipyu do eeshi vati kadi hole oupyu. Okwa ti oha kendabala ngaho e di tuvikile nokanete. Okwa weda po yokutya natango omeva omu ha tula eeshi daye nao ohaa kala omhumbwe yakula shaashi oha longifa ashike omeva okopomba.
Ongeshefa yaye oi li tai yandje eemhito doilonga mOngonga kwaava have ya okulanda eeshi vo tave ke di landifulula. Okwa ti natango ngeenge ondama yeeshi tai wapalekwa natango oha kutu ovanhu ava have ya okuwapaleka, ye te va pe sha shomondjato.
Emiljo okwa ti meedula dokomesho okwa hala oku nenepeka eendama daye deeshi, yee tatu oshiwana omukumo shikufe ombinga mounafaalalama keshe shaashi oyo ashike ondjila yokudja ko oyo.
-taimihaihambo2000@gmail.com