Auleria Wakudumo

Ehangano lokutunga omaumbo oNational Housing Enterprise (NHE) ola holola kutya otali ka tunga omaumbo 54 molukanda Ehenye mOshakati. 

Omaumbo aa otaa ka tungwa kongushu yoshimaliwa shi fike peemiliona N$15.6. 

Omunambelewakulunhu koshikondo shoikwafifohongo neyambule po lomaumbo Indileni Iipinge okwa holola kutya oproyeka yokutunga omaumbo mOshakati oya pewa ovatungi vatatu opo va dule okutunga omaumbo aeshe 54 meendelelo. 

Omaumbo okwa teelelwa a kale a pwa okutungwa moule weemwedi nhano, fiyo omomafiku 17 Apilili modula taiya. 

“Oproyeka ei itai ka tunga ashike omatungu oshiwana ndele otai ka yandja yoo oilonga koshiwana. Ovanhu ve dule po100 otava ka mona omhito yokumona oyuuyemo yopefimbo pefimbo letungo lomaumbo aa,” Iipinge ta holola ngaho. Eshi okwa ti otashi kwafele yoo okuyambula po omwaalu wovanailonga moshilongo oshoyo moshitukulwa. 

Iipinge okwa ti oproyeka ei itai ka shuna omutwe moipeta, otai ka twikila okutunga omaumbo meedoolopa nomoitukulwa ya yooloka moshilongo. 

NHE ota twikile okutunga omaumbo ombilixa moshilongo nokukwashilipaleka kutya Ovanamibia aveshe ovena omatungu opamufika wopombada koshimaliwa shili peduelela. 

Iipinge okwa yelifa kutya omaumbo okuli paendodo da yooloka. Eshi osha hala okutya omaumbo okwa yooloka mounene. Amwe okuna oule weesquaremita 38 fiyo 69. 

Omaumbo okwa yoololwa ngaho opo a dule okukwatela mo ovanhu aveshe ovo vena oyuuyemo yopedu nopokati. 

Iipinge okwa holola kutya okudja mo2019, NHE okwa pondola okutunga omaumbo 200 mEkuku, Oshakati keemiliona N$78. 

Eshi oshili omangela yaNHE, okukala ta tungu omaumbo modoolopa yaShakati. NHE okwa tunga yoo omaumbo mahapu medoolopa dimwe ooh aa ifanwa ashike kutya omaumbo oNHE nokuli. 

Omunambelewakulunhu okwa shiivifa yoo kutya elelo lodoolopa yaShakati ola yandja Ompumbu Extension 3 kehangano lavo opo li tunge omaumbo ponhele opo. 

Ompumbu Extension 3 oyina eenhele 237 omo dili 228 da nhuninwa omaumbo onduda imwe. Omanga elelo lodoolopa yaNgwediva lali la yandja eeplota 260 molukanda Efidi Extension 6 koNHE opo i dule okutunga eenhele odo. 

Iipinge okwa koleka kutya eenhele da pungulwa kOmpumbu Extension 3 kutya oda nhuninwa ovanambelewa vetanga leameno unene ovakwaita novapolifi. 

Okwa weda po yoo kutya NHE okuli metifa lomangela yokulanda edu ile eenhele da kula mOngwediva nOshakati. 

Iipinge okwa indila omalelo edoolopa noshilongo ashishe opo a yandje eenhele domaumbo kehangano lavo opo li dule okutunga omaumbo Ovanamibia aveshe. 

-wakudumoauleria@gmail.com