Paulina Ndalikokule 

Stefanus Nambara 

Nkurenkuru-evango lyepe Nkurenkuru Vocational Training Centre (VTC) moKavango zoutokero kuna kukapaturuka mwaFebruary mvhura ozo, novarongwa nye ava vana kukatambura wokusika ko 100. Namibia training authority (NTA) mukurona gwawo pamberewa Erick Nenghwanya katente asi evango eli kwaligazara ngano lipaturuke mwaNovember mvhura zeezi, ngesi tuna rundurura dogoro mvhura ozo morwa koyili vana kuwapayika eyi yakere asi kapi yina sikimo omu zawapera sure zangesi. 

Komitiye zegendeso kapi yazihafesa eyi yimwe yina pilire kuwapa omu gayirugana mutungi. 

Makura ose yipo nye twarundurura ezegururo paveta dogoro mvhura ozo mokwedi kwaFebruary 2026, yipo vawapukurure oyo yina pilire kuwapa. 

Nenghwanya katente koministeli zonombudi nomagwanekero opo kakadingwire komukunda moutatu una puko. Yimwe eyi kavakamwene kwato mpito zokupitira vakwetu avaparuka nourema. ‘’ Kapi tatusigiko vantu vamwe komavango gana kara asi gepangero. ‘’ 

Evango eli lyahepa kukara lyanatuvenye.’’ Nenghwanya katente asi morwa omu nye zina kara ngesi doropa zaNkurenkuru, yavaninkisa vature asi vahepa kudikapo mararo govarongwa. ‘’ Ose naturugananye yokurandanga moomu mwaNovember ano kudika nye nonzugo dokurara tavaditameke kudidika kehagero lyomvhura zeezi,’’ yimo ana kutanta. 

Ava nye vana kara asi wokuhova evango eli nalikagusa nye varongwa wokuhova noyirongwa yine omu muna hamene solar, egendeso, plumbing,clothing omu nayikakara asi 25 mwankenye sirongwa. ‘’ Ose kunakutameka nakauke nakauke, kapi navapitakana 100 moomu vana kuza komeho yimo hena vana kuwapukurura. 

NTA kwaruganesa silinga zokusika ko N$64 miliyuna omu nye vadika evango eli omu vanalimana nonontanmbo mbali. ‘’ Maliyongo pokatji NTA, mutungi, ntani nompitisili domomukunda kapi vadihameseramo, eyi yina kara asi yiyo yimwe tuna kuwapukurura. Vatungimo vahepa kulizuvha asi yiwo venya evango eli, yimo ana kutanta. Age katente asi yirugana yimwe navayirugana vatungi wovape, ntani vadeuli vaNTA vatunde komavangio gamwe. 

Nguuru gokmukunda Kavango zoutokero Verna Sunimbo katambwireko ekuliko eli nomawoko gavali, nokutanta asi sirugana sangesi hawe kuna wapa unen kuna kuwapukurura vadinakntu vetu. Ose kuna kupandura NTA omu vana kurugana mokutwara komeho ekuliko lyonomukunda noyitundwamo yoyiwa,’’ yimo ana kutanta.