Taimi Haihambo

Ehangano loku yandjakaneka omalusheno moNamibia Nampower ola kwafa eefikola mbali dili moushilo woHangwena, Oluwaya Combined School osho yo oTitus Ndjaba Combined School.

Oluwaya Combined School vati oya tungilwa oluumbo lofikola, osho yo okanduda koku kala ovatonateli vomaliko oufiku.

O Titus Ndjaba Combined School oya tungilwa eengulu dovanafikola dili nhatu, omo Nampower a longifa oshimaliwa shi fike poN$ 1642370, kumwe aishe nOluwaya Combined School.

Umwe womovanambelelwa vaNampower oo naye a li e ya keyandjo lomatungo eefikola okwa ti Nampower kwe li pyakidila noku yandja kanifa omakwafo keefikola dihapu moshilongo, unene tuu edi dili komaushai, opo ovanafikola hava i keefikola oko va dule okulihonga ve li pakamo lela.

Omukulunhuwiliki wehongo moHangwena Isak Hamatwi okwa ti oshitukulwa shaye osho shimwe shina omwaalu wovanafikola vahapu, noku udite etumba la kula eshi Nampower eva dimbuluka.

“Otwa idilila omwaalu wovanafikola va koya po 134 000, ndee nomashongo aa hatu taalele efiku nefiku oha a kala aahapu unene,” Hamatwi.

Okwa yelifa kutya eefikola dihapu onghee ngaho dina aovanafikola tava longelwa meengulu dakulupa, dimwe odina omhumbwe yomambo osho yo oipundi noi taalafula.

“Omakwafo oludi eli oha akala lela a pumba, nondapandula Nampower eshi etulongela shomupondo,” Hamatwi ta yelifa.

-taimihaihambo2000@gmail.com