Ndango zaBukalo zodoropa kazitulire Chester Likando asi yige munamberewa kurona gokukwateramo, mosiruwo oso vana kara nelikwamo lyokupapara ogu nagusa nye sirugana sina somukurona momberewa zodoropa zina. Eyi kuna wizirepo sinkwa ntani kwedi kakupwire omu mukurona pamberewa Martin Limbo, ganyokere kutunda momberewa, nampili ngomu gayimwene asi ekuto lyendi mosirugana kwahege mokwedi kwaKudumonkuru. Ano ngesi apa tuna kuhuyunga Limbo kageveko nye nonsapi domberewa sivike sina puko. Eturo lyendi mosirugana kwahege mo 31 May ano wondango kapi vagwedererako nampili mazuva asi akare murugani gwawo. Mukurona ogu gwanare age kwakere ana nyoka kugavako nonsapi, nye gayimwene asi vana mupe mbapira zendi zina kulikida asi mbapira zendi zeturo moyirugana kapi vanazigwederere kukwama matokoro gatundire mosigongi somo 24 Murongankuru. Age posiruwo simwe kwapatanene asi kapi vamupa rumwe mbapira zina kutanta asi atunde momberewa, omu gatente asi nampo simpe taziwiza. Munasipundi gondango zaBukalo Candy Namatama moutano kayinkondopekere asi ndango zatura nare murugani kurona ko HR, Likando akare asi yige ana kukwateramo siruwo esi.
“ Ose nare twatura Chester Likando asi yige mukwatelimo momberewa zomukurona gondango ezi momazuva 1 Pembagona,” yimo ana kutanta Namatama. Nye age simpe katente asi aw okapi vana tura evango eli momatjingiso morwa simpe ogu Limbo kwavatwara kompanguro zoyirugana awo simpe kuna kundindira etokoro. Age simpe kuna kukondja asi eturo lyendi moyirugana valigwederereko mazuva ndi nomvhura, makura age yipo nye gatwara ndango komberewa zovarugani vakatare asi kuvhura simpe atwikire ndi hawe. Ezuva eli vana turapo lyokukayipurakena kuna kara mo 1-3 September modoropa zaKatima Mulilo. Mombapira nye ezi katumwene ose vaNew Era, zomomazuva 6 May, vatjangera komunasipundi Namatama, Chris Mayumbelo & Co kuna kara asi awo kuna hara muntu gwawo vamutengwidire mosirugana sendi omu nakakaramo hena nomvhura ntano nazikahaga mo 31 May 2025 nsene asi vaziwapukurura. “ Sigongi seni sokansela noyitundwamo yaso yomo 17 February 2020, omu mwatokwere asi kapi muna kukagwedererako mazuva nkenye komurugani ntani muntu gwetu, vahepa etokoro olyo kuliza no veta gona 15(1) zonondango zonodoropa veta 1992 (veta nomora 23 zomo 1992) kukwama omu vaziwapukurura, yimo ngoso zina kutanta mbilive. Kansela kwahagekesere Limbo mo 7 October 2016 omu gazire nonzambi zendi nazinye ano eyi yayakwemeko makura tavayamutjida mo 17 August 2017. Limbo makura yipo nye gatuliremo esivano kumwe novakansela wondango nokuhameseramo vakansela womukunda kutunda nye mo 19 September 2017. Makura yiyo nye yaza kompanguro dogoro mo 14 June 2019, omu vana yimanesere. Ano Limbo kwakere nye mufundi kumwe nomumutengwidira mosirugana sendi kutameka mo 1 October 2019. Posiruwo ose age kuna hupuko nye tupu makwedi ntantatu eturo lyndi mositrugana likapwe mwa 31 May mvhura zeezi, morwa age kwatamekere mwa 1 June 2015. Vakarelipo vendi nawo yimo vana kuyimona ano vakansela awo kuna kuyimona asi hawe siruwo saLimbo sapwa sokukara momberewa.-
– anakale@nepc.com.na