Rundu – Hompa Alfons Kaundu, mpitisili gorudi rovaMbunza moKavango zoutokero, katente asi epangero kwavasigilira unene momukunda gwendi mokutara asi matungo nekuliko musinke lyahorokamo. Kaundu posiruwo sokukamudingura mosiruwo sosisupi mombara zendi poKapako omu kakamudingwilire mpitisili gombunga mpatanesi zopaveta, McHenry Venaani, age katente asi momukunda gwendi kapi muna kara nonzira donongwa ntani yipangero gona. “Ose kwatusigilira epangero siruwo sosire’’, yimo ngoso ana kutanta.
“Ose nare twagusa kugava maudigu getu aga koministeli zoyiruga nougendero kuhamena nonzira nye dogoro ngesi kwato yina litjindji ko, ndi varuganako. Nofarama detiu ure dakara nye kwato nonzira dokuzako, nsene asi ono hara kurandesa kwato eroli lyokuvhura kuzako ntudi munafarama gahepa kuzako akasinge nongombe dendi porupadi. Kugusako nye asi kwwato nonzitra, Mbunza kwalifana tupu ngwendi mukunda nagunye gwaKavango zoutokero omu tuna kara asi mwato yipangero gona vantu vahepa kugenda sinano sosire vakasike oku navakagwana uhaku. Mbunza kwakara nevhu lyewa, nofarama detu kuvhura kuretamo Yuma yoyiwa tuna heap nonzira yipo tugwane muzangu gomuwa. Ose moMbunza kapi tuna kara noprojeka zokuzangura nomfi ndi nkenye yimwe yokuvhura kugusapo epiro yirugana ntani kuwapukurura eparu lyovantu vetu. Mpitisili ogu gwaPDM kuna kara nomudingu gwendi gopaveta omu ana kuvatantera vatungimo asi age egano eli ana kugwana gahepa kukalitiura mombongarero zanavenye vakatara asi nomukunda edi mbali kapi tadikara doruhepo. Ame mpitisili ogu avhuru kupurakena vantu navenye, ame ngesi ninapwaga oku nakara niyapurakene maudigu govantu. Venaani katente hena asi nomukunda edi mbali kapi tadikara asi doruhepa vahepa kuliyonga momunene vatare asi ngapi navavatera vantu vatungamo vatunde moruhepo. Ame kuna kara nelikwamo lyopayirugana omu nina kuyatara asi yinke vana hepa vantu, ngesi nayagwana asi nonzira ntani ruhepo yiyo yimwe vana kumona. Nondima ntani epiro yirugana yimwe eyi vana kunana nayo momukunda. Morwa sinke vakarera asi woruhepo ntani yinke natuvhura kurugana yipo vatunde vantu ava moruhepo oru. Venaani katente asi age naruganesa siruwo esi mokudingura nompitisili dopampo, nongerera ntani vanguuru wonomukunda edi mbali. –jmuyamba@nepc.com.na