ONGWEDIVA – Johannes Esser, a shivika nawa nedina Assa Boy okwa ti naye okwa nukila mo mondabo nokushika eengalo doKwaito odo di holike unene kovanyasha.
Omunyasha ou a dalelwa komukunda Eengwe moshitukulwa shaHangwena okwa ti oha kala e udite ombili ngeenge e li komesho yovanhu ta shiki eengalo.
“Okudja ashike kounona okwa li ndi hole okupwilikina eengalo doKwaito naashi osha eta opo ndi longife ounongo wange okwiimba eengalo,” Assa Boy ta ti.
Okwa ti okwa shika ongalo yedina “Oshikondobolo” omo ta ti kutya omulumenhu owa pumbwa okulonga noudiinini nokukala u na eenghono.
Esser okwa yelifa ta ti okwa longa pamwe naKaboy Kamakili osho yo DJ Quality, mwa kwatelwa Paavo Haimbodi ou e li omukwatelikomesho weengalo daye.
“Ova kwafela nge unene nokutwa nge omukumo opo ndi dule okukala handi shiki eengalo nondjungu. Onde va pandula unene shaashi ngeno kava li po ngeno inandi shi pondola aame auke,” Esser ta ti.
Okwa ti yo kutya pefimbo kwa li munini okwa xwaxwamekwa kovashikingalo vakula moshilongo ngaashi Gazza, Young T wokOngha osho yo The Dogg.
“Onda kala alushe ndi hole okupwilikina eengalo davo fiyo naame nda kufa ko oshihopaenenwa shiwa osho va ulikila nge,” Osho a yelifa.
Okwa kumaida ovanyasha ve li momaumbo opo va longife ounongo wavo shaashi osha fimana.