Aantu ye li 206 oya mangwa po sho ya adhika niingangamithi ya yooloka inaayi pitikwa moshilongo. Sha ikolelela kuuyelele wa gandjwa komupopiliko gwopolisi moshilongo Kauna Shikwambi, aantu mboka ya mangwa po, omwa kwatelwa Aanamibia osho wo yamwe yokiilongo yokondje. 

“Opolisi oya lopota kutya aantu ye li 196 Aanamibia, Aangola yatatu, Aatanzania yatatu osho wo Aakongo yane,” ta ti ngaaka.

Shikwambi okwa ti, iingangamithi ayihe mbyoka oya lopotwa ya mangwa naantu momwedhi Kotomba aguke oshilongo ashihe. 

“Iingangamithi ayihe ya kwatwa ko kopolisi ongaashi Cannabis ngoka ogo ga lopotwa ga kwatwa ogendji, ge na ookilogalama 716, Mandrax dhi li 7 174, uusila woCocaine woogalama 207 osho wo oopela dhokukutha mo omategelelo dhili 41,” ta yelitha ngaaka. 

Opolisi inayi lopota kutya iingangamithi ayihe kumwe oyi na ongushu yoshimaliwa shi thike peni. Opolisi oya ti, iingangamithi oyo hayi piyaganeke omadhiladhilo omuntu opo a ka longe iiningwanima inaayi uka.

Tayi kumagidha oshigwana shi hulithe po okulongitha iingangamithi oshoka oya nika oshiponga.  

“Kehe ngoka ta ka adhika niingangamithi otaka pewa egeelo lye lya gwana,” opolosi ya ti ngaaka. Otaku fekelwa aakwiilongo oyo haya yakele iingangamithi moshilongo, nonando oye shi kutya inayi pitikwa moshilongo. 

Aanona oyendji oya thigi po oosikola, ya yi momapandaanda, omolwiingangamithi taya longitha. Aanyasha oya hanagulwa po kiingangamithi, neilongo kaye na nalyo, oshoka oonkalamwenyo dhawo oye dhi tula miingangamithi. 

Opolisi otayi kumagidha oshigwana shi kale aluhe tashi lopota mpoka nenge ngoka ta landitha iingangamithi. 

Tayi ti, aantu mboka inaya pumbwa okukala moshigwana oshoka otaya teyagula po aantu, oya pumbwa okukala moondjedhililo.

-vkaapanda@nepc.com.na