Taimi Haihambo
Omupilima woshilongo Elijah Ngurare okwa kunghilila Ovanamibia va kufe ombinga, vo ve lipake mo makonakono okaanghela. Eshi okwe shi popya pefimbo a li ta talele po oshitukulwa shaShikoto, nelalakano lokutandavelifa ouyelele u na sha noshiponga shomukifi wokaanghela.
“Otwa didilika omwaalu wovanhu ve na oudu wokaanghela tau i pombada keshe odula,” ta ti ngaho.
Ouyelele otau ulike kutya kodula ouministeli ohau dulu okukala u na omwaalu wovanhu ve li po 4 000, ile ve dulife po, va didilikwa nomukifi wokaanghela. “Movanhu ava ngaha, otwa kwatela mo ovashamane va didilikwa nokaanghela yokoulumenhu, ovakulukadi nokaanghela yokomavele osho wo ounona koilyo yomalutu a yooloka,” ta ti ngaho. Okwa twikila ta ti, ovanhu vahapu pefimbo tave ke li didilika tave liyavayaava, osheshi nale ombuto ya dilingila olutu alishe.
“Omunhu nande ou wete kutya ku na lela apa wu udite, inda ashike u ke likonaakonife opo u kale u shi apa wa fikama, ngeenge tashi ya pouhaku woye,” ta ti.
Ngurare natango okwa yelifa yo kutya epangelo ohali yandje oshimaliwa shi hapu kouministeli shi na sha nokukwatela komesho eemhumbwe douhaku.
Ashike vati nande ongaho, oimaliwa ihapu fimbo limwe ohai ke lihanga tai twilikile ovanaudu ava hava tutwa koitukulwa meni loshilongo, tava etwa koshipangelo shaCentral, shaashi oko ashike haku yakulilwa ovanhu ava va divilika kokaanghela.
Okwa weda po yo kutya Ovanamibia nava kale, hava tula ouhaku wavo komesho, opo va kaleke po oundjolowele wavo.