Katima Mulilo – ndango zodoropa zaKatima Mulilo kavahagekesere posiruwo supi mukurona pamberewa ogu aga magano paveta ndi asi ngwendi ahende, nomagwanekero, Patrick Lifasi Lilungwe, pwahana kumana siruwo.
Ntumwaraka ezi kavazitumine mosondaha, kutundilira kondango zodoropa muhuyungilipo gwazo Chrispin Muyoba, nokutanta asi ehagekeso eli lyokukwateramo kuna tameke nye mo 10 November, mokukwama nye veta ezi zakarapo sintokorwa 29(6) (b) moveta zonondango donodoropa.
Mbudi ezi kuna kutanta asi Lilungwe kapi naryugana hena yirugana yondango zodoropa nampili nakauke kukwama evango eli gakere nalyo mondango, mosiruwo nye esi ana kara asi vana muhagekesa siruwo sosisupi, age kumwe nye nokugava ehuguvaro kovatungimo asi sirugana tasitwikire moomu sakara nanare nokukeverera vanamberewa vetu moomu yawapera. Kunda nye asi yinke kavamuhagekesere simpe kapi yina divikwa. \‘’KMTC simpe kunalituramo mokuruganena vantu nokutanta asi kuna kara nye negendeso lyewa, kuna kuyikeverera nayinye nokuza nye moomu avarugana vasikisemo sirugana sawo.
Ehagekeso lyaLilungwe, kuna kara nye asi kuna gumu mberewa ezi zonene moKMTC, kukwama mo28 October mukurona gomberewa zaKMTC nage gumwe yaguma eyi.
Ndango mosondaha kavatente asi eyi yokupya mberewa zawo yina ninkisa ntanko vadiruke vaze kevango eli lyoWooden Bridge murukanda rwaBoma, kutunda nye mo 17 November 2025.
Muyoba kombudi nye ezi kageve pwazene, mosondaha katente asi ediruko eli lyokukwateramo kuna liretesapo morwa mundiro ogu gwagupire mo 24 October 2024, ogu nye gwapira nokuzonagura mberewa zomakul iko eyi yatwarederere asi pwaha kara sirugana nkenye. ‘’ Vatungimo kuna kuvahundira, vakadingura Wooden Bridge omu nye navaka gwana sirugana nasinye omu muna hamene magano twaromo gomatungo, evhu omu navaliruganesa, ntani nayimwe ngoso yohepero yimo ana kutanta ngoso Muyoba montumwaraka.
Muyoba simpe kageve mbudi zoruhafo zina kutunda kondango, omu kavakere tavandindire, eruganeno kumwe, ntani kuzuvhako eyi nye kavalikidire vatungimo mosiruwo nye esi kavakere naso. -Nampa