Auleria Wakudumo
Ouministeli wouhaku nonghalonawa owa holola kutya owa yandja oshimaliwa koitukulwa ya yooloka opo i lande eepela odo da pumbiwa moipangelo unene eepanado.
Ouministeli owa ti owa ninga etokolo eli opo oitukulwa i dule okulanda eepela odo va pumbwa ponhele yokuteelela keembonge dakula.
Omukulunhuwiliki mouministeli Penda Ithindi okwa nyamukula ngaha momukanda oo wa nyamukula omapopyo oo e lihanena komalungula kutya moipangelo kamu na eepela unene eepanado osho yo oukita vokukonaakona o-HIV.
Vahapu komalungula ova holola kutya ova ya koipangelo ndele inava pewa omiti, mwa kwatelwa opanado yo vene. Natango ouyelele umwe wa kala nokuandjakana komalunga okutya moipangelo kamu na oushina wokukonaakona omukifi wo-HIV.
“Ouministeli owa didilika shili kutya omiti dimwe otadi kande omapunya moipangelo. Ashike nande ongaho, otwa katuka onghatu yomeendelelo opo tu kwashilipaleke kutya oshiwana osha mona omiti nouhaku meendelelo,” Ithindi ta holola.
Ithindi okwa holola yo kutya ouministeli owa katuka onghatu okukala tava tambulafana omiti moitukulwa. Ouministeli owa didilika kutya oipangelo imwe ohai kala i na omiti dihapu omanga ikwao ihe na sha nandenande molwomwaalu wovanaudu meenhele da yooloka.
Nande eepela deepanado tadi kande omapunya moipangelo, ouministeli owa kwashilipaleka kutya eepanado domeva nadikwao odo tadi longifwa paife. Ouminsteli owa tula mo nale eindilo leepanado 3 000 000, odo da teelelwa di fike mokati kaDesemba 2025. Edi oda teelelwa di kale da kwafela oshiwana oule weemwedi 12.
Ithindi okwa nyamukula omapopyo kombinga youshina vokukonaakona omukifi wo-HIV.
“Oushina womakonakono omukifi wo-HIV omu na natango ve fike po2 400 ovo tava kwata natango oule weemwedi mbali fiyo nhatu manga inava pwa mo. Ouministeli owa tula mo yo eindilo loushina 15 650. Ava ova teelelwa va ka kwate oule weemwedi 11 oshilongo ashishe. Ova teelelwa va fike moshilongo mouxupi weemwedi 12,” Ithindi ta ti ngaho.
Ouministeli owa holola kutya moipangelo omu na oushina vokukoleka oidjemo ovo hava ifanwa oUnigold (confirmatory test) oule weemwedi hamano. Ava opo va fiki moshilongo oshivike sha dja ko.
Ithindi okwa kwashilipaleka kutya ouministeli otau twikile okuyandja omiti da yooloka koitukulwa aishe yoshilongo opo va kwashilipaleke kutya oshiwana osha mona ouhaku we lixwa po.