Matheus David

Zion Christian Mission Senters tawa ǁkhāǁkhāsentoa hân tsî Shincheonjis di Māsenxa khoen tsîn ge ǀgūǁae, !anu!anusens ǁaxasigu ǀkha People’s ǂAm Skoli !gâb ai ǀAeǁgams di Katutura ǁanǁguib !nâ ge ǁaxa i. !Anu!anusens di ǂâibasens ge, hoa khoen !aroma ǂurusib tsî !norasasiba īǁkhā kais ai ge !ammâisa i. ǁAupexan ge 80 māsenxa khoeba nē ǁaxasiba ge ǁhao!nâ hâ i. Khoen nēng ge !nandi !nâ ǀgoraǂgāgu tsî ǀawona ūkhâi, !āb !nā-aiba !anu tsî nēs ǀkha ǁnā ǂnamipeba hoan, !gōsase ǁnā ǁanǂgāsaben !aroma a !norasa mâsib !nâ ge sī-ū. Nē khoen di !khōǁôagu tsî ǀguipa mâǀhaos ge a ǁgau !khais ge, kaise i hâna a ǂhâǂhâsa !khaisa, hoadu ra tsâǀkhā tamas ka i o hoadu ǂnamipeb !nâ hâ !khaiga hoaǁae !anuse nî ūhâse isa tsî nēsa ī ǁkhā kais !aroma ǀhûhâsib ra dītsâ xūn hîa ai!gûsa ra ǁgaun !nâ ǁhaosa. ǀAms ais nēsa hoan !aroma !norsa ǂnamipeba ra mā amaga. ǁKhātis ge nē !anu!anus ǁgūbasa, ǁnāti ī ǀgaugu hîan ra ǂkhamkhoen, ǁnān ǁkhāǁkhāǂuisentoa hân tsî māsenxase ­ǁîn ǂkhâ!nâsa ra mān !kharagagu !hūgu !nâ Zion Christian Mission Senterdi tawa hâna xu hâ. ǀGūǁaes ge Zion Christian Mission Sentersa 59 000!gôab  xa a !nāsa !gôab di khoen, ǁkhāǁkhākhâide ǁîs !nâ-ū !khō!oa hân !aroma gere tsēdi, nēs ge  hoa !hūbaisise hân ǂnamipesa. Nēpa a !khōǂgāsa khoen ge ǁkhāǁkhā-aon tsî gagasi ǂgaeǂgui-aon hîa ǀhûhâsi !oabadi !nâ a !ân tsîna. Nē !anu-aon hîa ǀgam !nanra xu ge hâ in ge !anu tsî a !norasa ǂnamipeba ge ǁawoǁawo, tsî nēs ge a ǂoaxa-ūs ge nē-e nau-i di !omma !khōs ǀhûhâsiba. Nē ǁaxasiba gere ǂkhâ!nân ge Interpack Beverages, ǀAeǁgams !Ā!khōmais, People’s ǂAm Skoli tsî NamBTS hâna. Nēs xōkhān ge nē khoena Namibiab ǀAoba ǀKhaes !Oabasa (NamBTS) tsî ǀaob ǀkhaes !nâs tsîna ge !â. ǂAuna khoen ge hā ǀaoǀkhaes !nâ ge !â tsî nē ǀaoǀkhaes gere !gûǁnâ!nâ ǂnamipeb ge ǂnuwisa i ǀgaub ge khoena turaba mā tsî sâsase gere tsâ kai. Kondjeni Kaimbib, ǁ­îb tsîn nēpa ge !khōdana-ao ib, ge māsenxa hui-aon tsî NamBTS tsîna koasa hoatsama gere mā.