TSANDI – Oshigwana shoka sha hogolola Etitatu ookansela yiitopolwa osho wo yomalelo goondolopa osha ti, osha nyanyukilwa omayakulo ga gandjwa kaanambelewa yokomisi yomahogololo.
Martin Shikongo ngoka e na uulema womagulu gomoshikandjohogololo shaTsandi okwa ti, eyakulo a pewa Etitatu ine li mona nale nkene a tamekele okuhogolola.
“Ethimbo ndyoka nda thiki pehala lyokuhogolola, okwa li nda lombwelwa kaandi ye momukweyo, inandi kala nominute dha adha kuntano, onda mana nale okuhogolola,” ta popi ngaaka.
Ta ti ngele okomisi yomahogololo otayi tsikile nokugandja omayakulo gatya ngaaka, otashi xwaxwameke oshigwana shi kale hashi ka hogolola, oshoka yamwe ohaya gandja omatompelo kutya omikweyo ohadhi kala omile.
Gerhard Matheus ngoka a li a fala yinakulu a ka hogolole kelelo lyopamuthigululwakalo lyOmabalantu okwa ti, oya li ya yakulwa nawa, yo inaya kala mo momukweyo.
“Aanambelewa oye na elandulathano lyi li nawa, oye na ombili yo otaya gandja omapukululo momukalo omwaanawa,” ta pandula ngaaka.
Omunangeshefa gokonooli Peter Kanu Amadhila ngoka a li a adhika momukweyo okwa ti, elandulathano ndyoka tali longithwa ewanawa.
“Opo nde ya po mpaka ashike ondi wete nkene ombepo yuukumwe osho wo elandulathano tayi pepe, ayihe otayi ulike yi li melandulathano,” ta popi ngaaka.
Aanambelewa yomahomagololo koshitopolwa shaMusati ayehe oya li ya imbi okayimbilo kamwe.
“Oshigwana osha li sha meneka ongula shi hogolole, ihe okwa li twa longo twi itula mo opo oshi yakulwe mbala. Omutenya okwa li taya ende kashona taku fekelwa molwomutenya,” taya fatulula ngaaka.
Taya ti, sho etango lya ka pa oyana, oyaka ninga oyendji momikweyo nonando hadho ngaa omileeleka, sigo otundi 21h00.
Oya popi kutya inaya kala yena uupyakandhi waantu oyindji oshoka omahala gokuhogolola ogali ogendji go ogena aayakuli ya gwana.
“Ina tu tsakaneka nando uupyakandhi wa sha, omahogololo oga enda nawa lela,” taya ti ngaaka.
Opolisi moshitopolwa shaMusati nayo inayi lopota omiyonena dhasha esiku ndyoka.