Auleria Wakudumo
Josophina Silas a shivika nawa Sabakatan, omunafikola nomunangeshefa weedula 24 okwa lundulula onghalo yaye ongomunafikola nomunangeshefa.
Silas oha hondjo eendjato da hondjekeka da yooloka okudja keendjato dovakainhu domeenghwapa dinini nodakula, eendjato dovanafikola nadikwawo da wedwa po.
Silas ota dimbuluka nawa efiku a kwatwa kediladilo lokuhovela okuhondja eendjato.
“Efiku olo onda tokola okutala ouvidio komalungula, handi tala nghene ovanhu unene Ovanigeria tava hondjo eendjato. Molwaashi onda li ndi na nale owino yokuhondja eendjato, onde lilombwela kutya ngeenge ovanhu ovo otava dulu okuhondja eendjato, naame ohandi dulu oku shi tula moilonga,” Silas ta holola ngaho.
Silas okwa holola kutya omanga ina kwatwa kohokwe yokuhondja eendjato, okwa li omupandi. Mokupanda kwaye, omo a kufa oN$150 okulanda oipumbiwa yokuhondja oundjato vaye votete.
Okwa ti eshi a ya kofitola yOmuchina mOshakati, okwa shivifilwa kutya oiyata yondjato oi na N$130 inamu kwatelwa oikweyo. Paife osha hala kutya moN$150 omo ngeno e na okukufa oN$130 youndjato osho sha li itashi dulu okuningwa molwaashi moshimaliwa omo, omo e na okukufa olefa yaye.
“Onda kala nokweendaenda nofitola fiyo handi litu po shimwe shishona kuikwawo, osho sha kosha ashike N$80. Okandjato kange kotete kaka li naana ngaashi nda hala ashike mushiinda shange okwe ka landa po ndele ta shivifile vakwawo aveshe ongeshefa yange,” ta ti ngaho.
Silas okwa ti okwa li ha ka landifa oundjato vaye komatala oko a shivifilwa kovalandi vaye kutya ova hala oundjato ve na oikweyo noundjato vakwawo meni. Ota ti ka li e na owino natango yokuwedela nokuhondja meni oundjato.
Eshi inashi mu teya omukumo shaashi okwa twikila ashike natango ta landifa ye te liwedele ko kounongo waye.
Okudja kokuhondja okandjato kamwe, Silas okwa ti paife oha dulu okuhondja nokulandifa oundjato ve dule 10. Meenghono daye, okwa pondola okulanda eshina lokuhondja li na ongushu yoN$15 000 moule weemwedi nhatu.
“Paife ohandi ongele oimaliwa yange opo ndi dule okufuta ofikola yange koAtlantic Training Institution oko handi lihongele okukwafa eendokotola domayoo. Ohandi ongele oshimaliwa shange opo ndi liwedele ko kelihongo lange nokuya koNamcol ndi ke liwedele ko keepoinda dange dondodo 12,” ta holola ngaho.
Oundjato vaye vamwe ove na N$100, N$150 osho yo N$200. Okwa ti okwa hala okuyambula po ongeshefa yaye, i kale yakula opo a shiive okuyandja oilonga kovanhu vahapu.
Ngaashi nde shi popya petetekelo kutya onda tameka ashike ongeshefa yange noN$150, ohandi kumaida ovanyasha nena kutya oto dulu okuhovela ongeshefa nakeshe osho u na po. Efimbo limwe ino pumbwa okuteelela u wedelwe po, keshe osho u na shamha ashike to tameke kashona, otashi ya ashike kondjila.
Mopaife, Sabakatan oha longele moshipeleki sha finana, shihe na eameno lasha. Ota indile ngeenge ope na Omunasamaria omunamutimanghenda ta dulu oku mu kwafa onduda ya fa i li xwepo omo a longele ile ekwafo la keshe osho ta dulu okumupa, nena ota pandula neenghono.